Сотні тысяч чалавек ужо падпісаліся на блог Святога Айца Бэнэдыкта XVI у «Twitter». Па словах кіраўніка Прэс-службы Апостальскай Сталіцы кс. Фэдэрыка Ламбардзі SІ, сам Пантыфік бачыць у гэтым новую магчымасць служэння Евангеллю. Разам з тым святар падкрэсліў, што сам па сабе партал не забяспечвае збаўлення.

«140 знакаў — бо столькі змяшчае адзін запіс у „Twitter“ — гэта нямала», — адзначыў кс. Ламбардзі, дадаўшы, што ў такім запісе можа змясціцца цытата з Евангелля або благаслаўленне. Кіраўнік Прэс-службы Апостальскай Сталіцы звярнуў увагу, што «слова Езуса, якое мы пачуем раніцай, а пасля носім у сэрцы і разважаем, можа быць для нас падтрымкай на ўвесь дзень, і нават на ўсё жыццё».

Аднак, заўважыў кс. Ламбардзі, запіс у інтэрнэце сам па сабе не дае жыцця, не дзейнічае аўтаматычна. «Свет не будзе збаўлены дзякуючы „твітам“. Але да некаторых з мільярда ахрышчаных і 7 мільярдаў людзей у свеце Папа зможа дайсці менавіта гэтым шляхам, перадаць ім Слова, іскру мудрасці, якую яны будуць насіць у сэрцы і дзяліцца гэтым з сябрамі на „Twitter“», — сказаў прадстаўнік Апостальскай Сталіцы, словы якога прыводзіць Ватыканскае радыё.

(AG)