Прысутнасць Папы на «Twitter» — гэта заахвочванне хрысціян да таго, каб іх голас быў чутны ў публічнай прасторы. Так пракаментаваў агенцтву SIR з’яўленне блогу Святога Айца ў інтэрнэце сакратар Папскай рады па сродках масавай камунікацыі кс. прэлат Пол Тай.

Па словах сакратара ватыканскага ведамства, гэта выраз пераканання Бэнэдыкта XVI у тым, што Касцёл павінен прысутнічаць таксама і ў лічбавай прасторы. Ён, як дадаў святар, там ужо прысутнічае — праз афіцыйныя сайты лакальных Касцёлаў, касцёльных арганізацый і супольнасцяў, асабістыя старонкі духоўных асобаў і вернікаў. А ўваход Пантыфіка ў лічбавую сферу, як падкрэсліў сакратар Папскай рады, павінен стаць падтрымкай і заахвочваннем для ўсіх, хто зацікаўлены, каб Евангелле распаўсюджвалася на «лічбавым кантыненце».

Прадстаўнік Апостальскай Сталіцы дадаў, што Святы Айцец жадае перадаць праз інтэрнэт пасланне надзеі, адрасаванае сучаснаму чалавеку. Адначасова Папа заахвочвае вернікаў дзяліцца гэтай надзеяй Евангелля, якая кажа аб Божай любові, і «не баяцца пазнаваць і разумець новую лічбавую культуру».

(AG)