Пра вялікую пашану сённяшняга Пантыфіка Францішка да Яна Паўла ІІ нагадвае Ватыканскае радыё ў 8-ю гадавіну смерці благаслаўлёнага Папы. У 1992 г. Ян Павел ІІ прызначыў кс. Берголіа біскупам, а ў 2001 г. уключыў яго ў Калегію кардыналаў.

Ватыканскае радыё прыводзіць фрагменты гамілій, у якіх тагачасны арцыбіскуп Буэнас-Айрэса казаў пра папу Вайтылу. У дзень беатыфікацыі Яна Паўла ІІ, 1 мая 2011 года, кардынал Берголіа падкрэсліў, што благаслаўлёны Пантыфік у сваім жыцці сузіраў Уваскрослага Хрыста і таму не баяўся і здолеў перамагчы дыктатуру. «Смеласць і рашучасць, якія дае нам Уваскрасенне Хрыста, упэўненасць у тым, што мы прабачаны любоўю Пана, пазбаўляюць нас страху, — заўважыў тады кардынал. — Няхай і сёння гучаць у нашым сэрцы словы Езуса і благаслаўлёнага Яна Паўла ІІ: „Не бойцеся!“».

Раней, 4 красавіка 2005 г., адразу пасля смерці Яна Паўла ІІ, кардынал Берголіа адзначаў паслядоўнасць, з якой спачылы Пантыфік сведчыў пра Хрыста. Па словах тагачаснага арцыбіскупа Буэнас-Айрэса, такую паставу немагчыма купіць або навучыцца ёй — яна выхоўваецца ў сэрцы праз адарацыю.

(AG)