Да малітваў і духоўных ахвяраў у інтэнцыі спаўнення волі Божай заклікаў вернікаў генеральны настаяцель Святарскага брацтва св. Пія Х біскуп Бэрнар Фэлле. Іерарх узгадаў пра сваю сустрэчу 16 сакавіка з прэфектам Кангрэгацыі Веравучэння кардыналам Уільямам Левада, калі было адзначана, што адказ лефеўрыстаў на «дактрынальную прэамбулу» не дастатковы.

У ходзе сустрэчы бок Апостальскай Сталіцы падкрэсліў, што важным з’яўляецца пераадоленне дактрынальных праблемаў, якія ляжаць у аснове існуючага падзелу. Да 15 красавіка Брацтва св. Пія Х павінна канчаткова высветліць сваё становішча ў дачыненні да «дактрынальнай прэамбулы».

Брацтва св. Пія Х заснаваў у 1970 г. арцыбіскуп Марсэль Лефеўр. Гэты іерарх быў удзельнікам Другога Ватыканскага Сабору, але не пагадзіўся з яго пастановамі, у прыватнасці аб рэлігійнай свабодзе, экуменізмe і міжрэлігійным дыялогу. Таксама арцыбіскуп Лефеўр не прыняў новы парадак святой Імшы і ў знак супраціўлення заснаваў дадзенае брацтва.

Пасля таго, як 30 чэрвеня 1988 г. без згоды Папы арцыбіскуп Лефеўр удзяліў біскупскую сакру чатыром святарам, Ватыкан сцвердзіў, што сам іерарх, яго супрацоўнікі і ўсе ўдзельнікі гэтай падзеі будуць экскамунікаваны.