7 мая ў Вашынгтоне было падпісана пагадненне паміж Апостальскай Сталіцай і ЗША аб супрацьдзеянні адмыванню грошай і фінансаванню міжнароднага тэрарызму. Заключэнне пагаднення паспрыяе абмену інфармацыяй і двухбаковаму развіццю ў фінансавым сектары.

З боку Святога Пасаду дакумент падпісаў дырэктар Бюро фінансавай інфармацыі Рэнэ Брульхард, а з боку ЗША — дырэктар дэпартамента па фінансавым кантролі Джэніфер Шаскі Калверы.

«Гэта ясны доказ таго, што Святы Пасад і Дзяржава Ватыкан сур’ёзна ставяцца да барацьбы з адмываннем грошай і фінансаваннем тэрарызму, — адзначыў Рэнэ Брульхард, чые словы прыводзіць Ватыканскае радыё. — Ватыкан прадэманстраваў, што з’яўляецца надзейным партнёрам на міжнародным узроўні».

Падобныя пагадненні ўжо існуюць паміж Апостальскай Сталіцай і Бельгіяй, Іспаніяй і Славеніяй. На дадзены момант Бюро фінансавай інфармацыі Святога Пасаду вядзе перамовы з іншымі краінамі аб падпісанні такіх дакументаў.

(AG)