Каментарый да літургіі

У першую нядзелю новага года стаім перад Панам, Богам нашым, каб святкаваць гэты дзень на Яго хвалу і праслаўленне. Напярэдадні гэтага года давайце складзем пастанову, што не будзем прапускаць без сур'ёзнай прычыны нядзельную святую Імшу і не будзем выконваць у Дзень Пана ніякай непатрэбнай працы. Хрыстус, які сёння прыходзіць да кожнага з нас, няхай дадасць нам сілы, каб добрасумленна выканаць нашу пастанову.

Каментарый да літургіі слова

Божая Мудрасць, на якую ўказвае Стары Запавет, уцелавілася сярод людзей у Асобе Езуса Хрыста. Ён, народжаны перад усімі вякамі, з’явіўся свету праз свае Уцелаўленне. У святле гэтай Мудрасці чалавек можа распазнаць сваё пакліканне, сваё прызначэнне і сэнс жыцця. Такім чынам, калі прымаем Хрыста, напаўняемся мудрасцю жыцця і дарамі Бога.

Малітва вернікаў

Бог з’яўляецца Мудрасцю, якая ахоплівае ўвесь сусвет, таму просім у нашых малітвах, каб Ён паглядзеў на людскія беды і выслухаў нашыя просьбы.

Выслухай, Божа, пакорную малітву:

1. Молімся, каб святло Хрыста асвятляла жыццё ўсіх ахрышчаных.
2. Молімся, каб Хрыстус, які прыходзіць да сваёй уласнасці, быў прыняты ў жыцці нашага народа, у нашых сем’ях і ў нашых сэрцах.
3. Молімся, каб дар Божага супакою прынялі ўсе людзі і адорвалі ім іншых.
4. Молімся за памерлых, каб назіралі вечнае святло, якое праз веру пазналі на зямлі.
5. Молімся аб светлых вачах сэрца для нас, тут прысутных, і ўсіх, якіх любім, каб мы пазналі, чым ёсць надзея нашага хрысціянскага паклікання.

Божа, які так палюбіў зямлю, што паслаў свайго Сына, дай нам любоў, якая вядзе да крыніцы сапраўднай Мудрасці. Праз Хрыста, Пана нашага.

Апрацавала с. Людміла Леўдаровіч MChR