Каментарый да літургіі

“Пан — мой пастыр, ні ў чым не буду мець нястачы…”

Трывае велікодны час, у якім асабліва яскрава можна адчуць удзячнасць і радасць за дар, які дадзены Богам чалавецтву – Езуса Хрыста Уваскрослага. Таксама гэта час асаблівага даверу, надзеі на тое, што і мы калісьці ўваскрэснем. На гэтай святой Імшы давайце задумаемся, што даў нам Бог у нашым жыцці, чаму навучыў нас падчас посту і за што можам дзякаваць ужо цяпер.

Каментарый да літургіі слова

“Езус зноў сказаў: Сапраўды, сапраўды кажу вам: Я — брама для авечак…”

Езус Хрыстус з’яўляецца нашай вузкай брамай у Валадарства Нябеснае. І толькі праз яе мы можам увайсці ў вечнасць і да Айца. Таксама чытаем у Евангеллі: “…хто ўваходзіць не праз браму на авечы двор, але залазіць інакш, той злодзей і злачынец…”, таму Езус – адзіны шлях да збаўлення. Калі мы разумеем гэта, то мы належым да Яго авечак, бо чуем сапраўды Яго голас.

Малітва вернікаў

У першы дзень тыдня пакорна просім Пана Бога нашага:

- Адары нашага Папу Францішка і ўсіх біскупаў свету мудрасцю ў іх пастырскім служэнні.
- Дадай уладам усіх краін разважлівасці ў дзеяннях, каб усё рабілі для дабрабыту грамадзян.
- Даручаем табе ўсіх церпячых і хворых, дадай ім вытрымкі і вернасці Табе.
- Прымі ў сваё Валадарства ўсіх, хто пакінуў гэты свет, няхай цешацца з Табой у вечнасці.
- Благаславі нас, прысутных ля Твайго алтара, каб вучыліся быць вернымі і паслухмянымі авечкамі нашага Пастыра.

Праз Хрыста, Пана нашага. Амэн.

Падрыхтавала Рэгіна Гасанна Атрашкевіч ОРs