3 чэрвеня Прэзідэнт Беларусі Аляксандр Лукашэнка сустрэўся з удзельнікамі ІV Каталіцка-Праваслаўнага Форума на тэму «Рэлігійны і культурны плюралізм: выклікі хрысціянскім Цэрквам у Еўропе». Форум, які адкрыўся напярэдадні ў Храме-помніку ў гонар Усіх святых і ў памяць бязвінна забітых у нашай Айчыне ў Мінску, будзе праходзіць у сталіцы Беларусі па 6 чэрвеня, у ім прымаюць удзел каталіцкія і праваслаўныя іерархі Еўропы.

Мэта Форума – кансалідацыя хрысціянскіх сіл Еўропы для сумеснага сведчання сучаснаму свету і абароны хрысціянскіх каштоўнасцяў. Раней падобныя Форумы праходзілі ў Трэнта (Італія), на востраве Родас (Грэцыя), у Лісабоне (Партугалія). Да ўдзелу ў Форуме запрошаны делегаты з 22 краін, у тым ліку больш за 40 каталіцкіх і праваслаўных іерархаў. Ініцыятарамі гэтай буйной сустрэчы сталі ў 2012 г. Мітрапаліт Мінска-Магілёўскі арцыбіскуп Тадэвуш Кандрусевіч і сённяшні ганаровы Патрыяршы Экзарх усяе Беларусі Мітрапаліт Мінскі і Слуцкі Філарэт.

Як адзначыў падчас сустрэчы з удзельнікамі Форума Прэзідэнт, Беларусь застаецца прыхільнай да міжрэлігійнага міру і спакою. Па словах Аляксандра Лукашэнкі, якія прыводзіць БЕЛТА, гэтая сустрэча абавязвае яго і ўвесь беларускі народ з яшчэ большай стараннасцю і адказнасцю падыходзіць да захавання міжрэлігійнага міру і нацыянальнага спакою. Прэзідэнт запэўніў удзельнікаў Форуму, што ў іх ніколі ў гэтым плане не будзе прэтэнзій да беларускага народа і беларускай дзяржавы. “Мы заўсёды будзем надзейнымі суседзямі, партнёрамі і сябрамі для ўсіх людзей, якую б рэлігію яны ні вызнавалі, які б шлях да храма яны ні абралі”, - сказаў кіраўнік дзяржавы.

“Беларусь унікальная тым, што яе гісторыя не азмрочана рэлігійнымі войнамі і міжнацыянальнымі канфліктамі. Мы беражліва захоўваем і перадаем з пакалення ў пакаленне добрыя традыцыі нашых продкаў: узаемаразуменне, цярпімасць, міласэрнасць, павагу да працы, міралюбства і патрыятызм”, - адзначыў Прэзідэнт.

Па словах Аляксандра Лукашэнкі, праваслаўе і каталіцтва гістарычна вызначылі менталітэт і нацыянальны характар беларусаў, і “сёння хрысціянская вера застаецца неад’емным складнікам светапогляду і духоўнага жыцця большасці нашых грамадзян”.

Прэзідэнт адзначыў, што Форум павінен паспрыяць умацаванню ўзаемадзеяння паміж людзьмі розных канфесій і поглядаў, дапамагчы ім знаходзіць кропкі судакранання шляхам дыскусій і плённага дыялогу. “Да такога падыходу нас абавязвае само жыццё. Нельга забывацца, што ў сучасным свеце ўсё больш становіцца ачагоў напружанасці і зон ваенных канфліктаў, якія нясуць велізарныя пакуты людзям. Таму ўсе дзяржавы павінны супольна працаваць для забеспячэння мірнай будучыні чалавецтва”, - сказаў кіраўнік дзяржавы, дадаўшы, што такая праца магчымая толькі пры актыўных і згодных дзеяннях як структур улады, так і грамадскіх інстытутаў, перш за ўсё рэлігіёных арганізацый.

“Царква можа многае зрабіць для збліжэння людзей і паяднання сусветнай супольнасці вакол сапраўдных каштоўнасцяў, - сказаў Прэзідэнт. – Словам і справай вы заклікаеце, як вучыў святы апостал Павел, “захоўваць адзінства духу ў саюзе міру””. Аляксандр Лукашэнка лічыць важным аб’яднаць намаганні прадстаўнікоў розных канфесій для таго, каб “наша планета стала спакойным і ўтульным домам для сваіх дзяцей”.

Звяртаючыся да ўдзельнікаў Форума, Прэзідэнт выказаў надзею, што гэтае мерапрыемства дазволіць ім адкрыць для сябе Беларусь, пазнаёміцца з яе прыродай, гісторыяй і культурай, а таксама з гасціннымі і мудрымі людзьмі. “Ваш прыезд у Мінск для працы і проста для чалавечых зносінаў – гэта значымая падзея ў духоўным жыцці беларусаў. Яна кажа пра прызнанне таго, што наш народ захоўвае прыхільнасць да хрысціянскіх каштоўнасцяў”, - дадаў Прэзідэнт.

Удзельнікі сустрэчы абмяняліся меркаваннямі аб тым, як у сучасным свеце супрацьстаяць выклікам, якія ўзнікаюць перад Цэрквамі, падкрэслілі важнасць захавання хрысціянскіх каштоўнасцяў у жыцці народаў Еўропы, умацавання міру і згоды.

(AG)
Фота Віталія Палінеўскага