Свята Перамянення Пана, якое адзначаецца ў Касцёле 6 жніўня, нагадвае людзям пра патрэбу пастаяннай змены свайго жыцця. Перамяненне Хрыста на гары Табор было прадказаннем Уваскрасення. Нагодай для вернікаў паразважаць над гэтай таямніцай стала адпустовая ўрачыстасць у парафіі Перамянення Пана ў Селіванаўцах (Гродзенская дыяцэзія).

Пасля Уваскрасення цела Хрыста стала адрознівацца ад цела чалавека. Езус уваходзіць праз зачыненыя дзверы, з’яўляецца і знікае, часам Яго распазнаюць, а часам не. Пра падобнае перамяненне нашага цела казаў апостал Павел. Перамяніўшыся на гары Табор, Езус «пераменіць наша прыніжанае цела на падобнае да свайго хвалебнага цела». Свята Перамянення Пана нагадвае ўсім вернікам, што кожнага чакае такая змена, бо наша сапраўдная айчына — у небе, а не на зямлі.

На малітве ў Селіванаўцах сабраліся шматлікія парафіяне, госці з іншых парафій і духавенства. Святую Імшу ўзначаліў кс. Павел Гедройць — дэкан Сапоцкінскага дэканата.

У гаміліі а. Дзмітрый Занямонскі OMI з Мінска прапанаваў вернікам паразважаць над пытаннем, што такое неба. «Неба — гэта яднанне з Езусам. Гэта стан шчасця, які мы не можам сабе ўявіць, але па якім сумуем», — адзначыў святар і дадаў, што «трэба мець нястомнае жаданне быць у небе».

Падчас Імшы вернікі маліліся таксама за свайго пробашча кс. Казіміра Енджэйчака ОМІ, які ў гэтым годзе дзякуе Богу за 25 гадоў святарства.

Урачыстасць завяршылася эўхарыстычнай працэсіяй вакол касцёла і спевам гімна «Te Deum laudamus», якім удзельнікі свята дзякавалі Богу за атрыманыя ласкі.

Кс. Юрый Марціновіч