Два святары, які шмат гадоў служаць у Гродзенскай дыяцэзіі, адзначаны
папскім крыжам заслугі «Pro Ecclesia et Pontifice» ад Святога Айца
Францішка. Папскія ўзнагароды былі ўручаны па просьбе біскупа
Гродзенскага Аляксандра Кашкевіча падчас урачыстасцяў 25-годдзя
заснавання Вышэйшай духоўнай семінарыі ў Гродне кс. прэлату Ежы Мар’яну
Лявінскаму i а. Андрэю Шчупалу CSsR.
Абодва святары ад самага пачатку існавання семінарыі ў Гродне
з’яўляюцца яе выкладчыкамі. Яны прыклалі вялікія намаганні ў справе
фармавання шматлікіх святароў, якія служаць у Беларусі і далёка за яе
межамі. Аб іх заслугах узгадаў біскуп Аляксандр Кашкевіч падчас уручэння
ўзнагародаў, адзначыўшы, што гэтыя святары – “стаўпы” семінарыі, з
вялікім запалам прысвячалі сябе семінарыі і
ўсёй дыяцэзіі і працягваюць рабіць гэта.
Ксёндз прэлат Ежы Мар’ян Лявінскі сёлета адзначаў
60-ю гадавіну прэзбітэрскага пасвячэння. Падчас урачыстасцяў 25-годдзя семінарыі, дзякуючы за вялікую
ўзнагароду, святар прасіў таксама аб малітве, каб мог далей служыць
Касцёлу і даваць добрае сведчанне для будучых і маладых святароў. Ксёндз
прэлат з самага пачатку існавання семінарыі прабывае ў ёй, штодзень
служачы ўсім тым, хто ўтварае гэтую навучальную ўстанову, сваёй парадай,
добрым словам і жыццёвай мудрасцю.
![](/2/images/phocagallery/2015/06/2015-06-17-grodna/thumbs/phoca_thumb_l_grodno-23.jpg)
Айцец Андрэй Шчупал CSsR
служыць у Гродзенскай дыяцэзіі ўжо больш за 26 гадоў. З пачатку
існавання семінарыі (1990 г.) да сённяшняга дня святар з’яўляецца ў ёй
выкладчыкам маральнай тэалогіі і тэалогіі духоўнасці, а таксама рыхтуе
шосты курс да паслугі спаведніка. 6 гадоў быў таксама духоўным айцом
семінарыі. Выконвае і функцыю спаведніка семінарыстаў. Арганізоўваў
разнастайныя навуковыя сімпозіумы. Айцец Андрэй Шчупал – місіянер і
рэкалекцыяніст, якога паўсюдна ведаюць і цэняць.
Пасля ўручэння
ўзнагароды айцец Андрэй Шчупал звярнуўся да ўсіх сабраных на юбілейных
урачыстасцях і, кажучы пра сваё служэнне ў семінарыі,
адзначыў: “Служэнне выкладчыка не было для мяне ніколі абцяжарваючым,
нягледзячы на многія іншыя абавязкі, бо чыніў гэта заўсёды з вялкай
любоўю да Езуса і дзяліўся гэтым з семінарыстамі. Ужо само разважанне
над неспасцігальнымі таямніцамі духоўнага жыцця было для мяне вялікай
узнагародай. Я нястомна дзякую Богу за дар святарства і законнага жыцця ў
супольнасці рэдэмптарыстаў”.
Уручаныя папскія адзнакі – доказ
прызнання за руплівую апостальскую працу ў Беларусі. Такім чынам біскуп
Гродзенскі Аляксандр Кашкевіч хацеў ацаніць вялікі ўклад гэтых святароў у
жыццё дыяцэзіі.
Кс. Юрый Марціновіч
|