11 верасня ў Вышэйшай духоўнай семінарыі ў Гродне адбылася ўрачыстасць, прысвечаная 25-годдзю існавання семінарыі, і інаўгурацыя 26-га навучальнага года. У гэты адметны дзень навучальную ўстанову наведалі многія шаноўныя госці, прадстаўнікі ВНУ горада Гродна, выкладчыкі, сябры семінарыі і бацькі першакурснікаў.

Урачыстасці пачаліся святой Імшой у семінарыйнай капліцы, якую ўзначаліў біскуп Гродзенскі Аляксандр Кашкевіч у канцэлебры з дапаможным біскупам дыяцэзіі Юзафам Станеўскім і шматлікімі святарамі. У гаміліі рэктар семінарыі кс. д-р Раман Рачко распавёў пра тое, на чым засноўваецца семінарыйная фармацыя.

Рэктар адзначыў, што ў семінарыі навучэнцы, якія прыходзяць, каб правільна распазнаць сваё пакліканне і належна падрыхтавацца да святарскага служэння, атрымліваюць усебаковую фармацыю: чалавечую, духоўную, інтэлектуальную і душпастырскую.

Святарства — адказнае заданне

Звяртаючыся да семінарыстаў, рэктар сказаў:

«Вы будучыня нашага Касцёла, будучыня нашай краіны. Гісторыя нашага Касцёла была нялёгкая. Сённяшні свет, абставіны, не заўсёды прыязныя да Касцёла, святароў. Нягледзячы на гэтыя факты, у вас не павінна быць песімізму, адмаўлення, але наадварот: павінна быць жаданне стаць добрымі святарамі, вучнямі Езуса, якія занясуць Божае слова да маладога пакалення і старэйшых, якія, можа, заняты працай, а асабліва да хворых і самотных. Трэба занесці Божае слова да хрысціян і тых, хто, можа, яшчэ шукае Бога».

«Гэтае заданне нялегкае, асабліва калі сёння патрабаванні да святара вельмі высокія, і, магчыма, не раз падчас фармацыі ў семінарыі ўзнікае пытанне: як выканаць гэтае заданне, як быць добрым святаром, якога чакаюць людзі і які патрэбны Касцёлу», — дадаў кс. Раман Рачко.

«Будучы святар павінен быць падрыхтаваны да абароны веры, якую мы атрымалі ў спадчыне ад нашых бацькоў і старэйшага пакалення. Сённяшні святар павінен выходзіць і шукаць згубленых, якія знаходзяцца ў пошуках веры, — падкрэсліў рэктар семінарыі. — Патрэбна сэрца, якое любіць Бога, Касцёл і бліжніх. Езус паклікаў простых людзей, якія мелі вялікае сэрца і веру — на гэта трэба асабліва звярнуць увагу падчас семінарыйнай фармацыі».

«Успамінаючы тую радасць і энтузіязм, якія былі ў дзень заснавання гродзенскай семінарыі, жадаю, каб гэтая радасць на нашых тварах была выразам даверу Богу, каб тыя, хто будзе слухаць вашыя словы, хацелі пайсці за Хрыстом, — дадаў святар. — Нашай Alma Mater Grodnensis, якая дала Касцёлу больш за 200 святароў і трох біскупаў, жадаю Божага благаслаўлення, новых пакліканняў і наступных юбілеяў. І як тады, 25 год таму, хочацца паўтарыць з верай і надзеяй: Вышэйшая духоўная семінарыя ў Гродне павінна быць, павінна існаваць».

Семінарыя — знак вылучэння

Пасля Імшы ўрачыстасці працягнуліся ў зале імя св. Яна Паўла ІІ. Біскуп Аляксандр Кашкевіч у сваім слове адзначыў, што існаванне гродзенскай семінарыі ўносіць вялікі ўклад у справу евангелізацыі і адраджэння рэлігійнага жыцця на нашых землях.

«Дзякуючы адказнаму і гуманітарнаму супрацоўніцтву ўсіх асобаў, якія ўтвараюць семінарыйную супольнасць, за чвэрць веку свайго існавання ВДС у Гродне сталася ўстановай вядомай і распазнавальнай у Беларусі і за мяжой, з уласнай гісторыяй і традыцыямі, трывала ўпісанай у касцёльную і рэлігійную рэчаіснасць Гродзенскай дыяцэзіі, а таксама ў акадэмічны, культурны і грамадскі пейзаж нашага горада», — сказаў іерарх.

Біскуп падзякаваў абласным, гарадскім і раённым уладам за разуменне і дапамогу ў вырашэнні пытанняў, звязаных з дзейнасцю семінарыі, а таксама выказаў падзяку ўсім установам і прыватным асобам за супрацоўніцтва ў розных супольных ініцыятывах, якія ўзаемна ўзбагачаюць усіх.

Звяртаючыся да семінарыстаў, іерарх пажадаў: «Будзьце людзьмі веры і малітвы, здабывайце веды і развівайцеся духоўна. Памятайце, што ўжо зараз, у семінарыі, вы штодзённа закладваеце фундамент, на якім будзе збудавана ваша святарства».

Касцёл — сіла, якая ўплывае на грамадства

З інаўгурацыйным дакладам на тэму «Каталіцкі Касцёл у сацыякультурным жыцці Гродзеншчыны» выступіў Эдмунд Ярмусік, доктар гістарычных навук, прафесар кафедры гісторыі Беларусі, археалогіі і спецыяльных гістарычных дысцыплін ГрДУ iмя Я. Купалы.

Дакладчык адзначыў, што стагоддзі існавання на нашай зямлі Каталіцкага Касцёла пакінулі значны след у гісторыі і культуры не толькі Гродзеншчыны, але і Беларусі ў цэлым.

«Апрача працы душпастырскай, Касцёл ахоплівае сваім уплывам адукацыйную, культурную, дабрачынную сферу жыцця грамадства. Касцёл праводзіць мэтанакіраваную евангелічна-выхаваўчую працу з дзецьмі і моладдзю, імкнучыся прывіваць ім хрысціянскія каштоўнасці і ўмацоўваць у каталіцкай веры», — звярнуў увагу дакладчык.

Эдмунд Ярмусік адзначыў, што на працягу апошніх дзесяцігоддзяў, часам пры неспрыяльных умовах дзейнасці, Каталіцкі Касцёл на Гродзеншчыне здолеў не толькі захаваць сябе як рэлігійны і сацыякультурны інстытут, але і праводзіць адпаведна ўмовам евангелізацыйную працу. «Зараз Касцёл з’яўляецца той сілай, якая, не ўключыўшыся ў палітыку, тым не менш аказвае значны ўплыў на працэсы, якія адбываюцца ў грамадстве, і імкнецца да таго, каб кожны католік змог адчуваць сябе ўпэўнена ў сучасным свеце і жыць адпаведна з асновамі хрысціянскай навукі», — дадаў выступоўца.

Таксама ў гэты дзень шэсць чалавек, якія паступілі сёлета на першы курс, атрымалі залікоўкі, такім чынам стаўшы паўнапраўнымі студэнтамі семінарыі ў Гродне.



У слове на заканчэнне біскуп Юзаф Станеўскі, шматгадовы рэктар і выхавацель гродзенскай семінарыі, выказаў удзячнасць ад імя ўсіх, хто выйшаў з гэтай установы і сёння ў імя Хрыста абвяшчае Божае слова і цэлебруе святыя сакрамэнты. Біскуп выказаў пажаданне, каб семінарыя, якая ўзвышаецца на прынёманскім узгорку, далей фармавала маладога чалавека і рыхтавала яго да служэння Богу і людзям.

Духоўная семінарыя ў Гродне была заснавана 1 верасня 1990 года біскупам Тадэвушам Кандрусевічам. Яна размясцілася ў мурах былога кляштара айцоў бернардынаў, пабудаванага ў XVII стагоддзі і злучанага з велічнай святыняй Адшукання Святога Крыжа.

Заступнікамі семінарыі былі абраны Найсвяцейшая Панна Марыя Беззаганна Зачатая, святы Міхал Арханёл і святы Юда Тадэвуш, апостал.

Момантам паўстання семінарыі, безумоўна, можна лічыць і дзень 18 жніўня 1990 г., калі адбыліся першыя ўступныя экзамены. У гэты дзень у семінарыю паступілі 37 кандыдатаў: 15 з Гродзеншчыны, 9 з іншых куткоў Беларусі, а таксама 12 з Украіны і адзін з Грузіі.

Першым рэктарам гродзенскай семінарыі быў прызначаны кс. інфулат Станіслаў Кучынскі, прэфектам па справах выхавання — кс. Люцыян Радомскі, пракуратарам — кс. Вінцэнт Лісоўскі, духоўным айцом — кс. Міхал Варанецкі.

Кс. Юрый Марціновіч