21 кастрычніка ў межах кананічнай візітацыі Астравецкага дэканату біскуп Гродзенскі Аляксандр Кашкевіч асвяціў капліцу ў Цэнтральным раённым шпіталі ў Міхалішках.

Асвячэнне адбылося якраз напярэдадні літургічнага ўспаміну св. Яна Паўла ІІ.

Капліца была ўзведзена дзякуючы старанням пробашча кс. Анатоля Захарэўскага і вялікай прыхільнасці адміністрацыі шпіталя.

Наведваючы шпіталь, біскуп Гродзенскі сустрэўся з медыцынскім персаналам і пацыентамі. Іерарх падзякаваў усім супрацоўнікам службы аховы здароўя за ахвярную і вельмі патрэбную працу сярод людзей, закранутых хваробай і цярпеннем. Усіх пацыентаў шпіталя біскуп заахвоціў ахвяраваць сваю хваробу і цярпенне ў інтэнцыі сем’яў і за навяртанне грэшнікаў.

Іерарх памаліўся разам з вернікамі Вяночак да Божай Міласэрнасці і ўдзяліў пастырскае благаслаўленне.

У капліцы пастаянна захоўваецца Найсвяцейшы Сакрамэнт, і кожны пацыент шпіталя можа прыйсці на індывідуальную малітву. Кожную суботу ў капліцы цэлебруецца святая Імша.

У той жа дзень біскуп Аляксандр Кашкевіч наведаў у межах кананічнай візітацыі найпрыгажэйшыя і гістарычныя парафіяльныя святыні Астравеччыны ў Гервятах і Міхалішках. Іерарх цэлебраваў у гэтых парафіях святую Імшу і сустрэўся з вернікамі.

Кс. Юрый Марціновіч