26 кастрычніка біскуп Гродзенскі Аляксандр Кашкевіч сустрэўся з прадстаўнікамі дзяржаўнай улады Астраўца. Сустрэча прайшла ў будынку Астравецкага раённага выканаўчага камітэта.

Пасля завяршэння кананічнай візітацыі Астравецкага дэканату гродзенскі ардынарый сустрэўся са старшынёй Астравецкага райвыканкама Адамам Кавалько і яго супрацоўнікамі. Біскупа суправаджаў на сустрэчы дэкан Астравецкага дэканату кс. Юзаф Багдзевіч.

Падчас сустрэчы іерарх падзяліўся ўражаннямі ад кананічнай візітацыі, якая праходзіла ў апошнія дні. Біскуп падзякаваў дзяржаўным уладам за плённае супрацоўніцтва і вялікую прыхільнасць у дачыненні да Касцёла.

Усім супрацоўнікам райвыканкама гродзенскі ардынарый пажадаў, каб іх служэнне заўсёды прыносіла благаслаўлёныя плёны і было накіравана на карысць грамадства. Іерарх заўважыў, што астравецкая зямля ў апошні час вельмі дынамічна развіваецца, у ёй паўстае інфраструктура, змяняецца аблічча горада, прычынай чаго з’яўляецца будаўніцтва атамнай станцыі.

У сваю чаргу старшыня Астравецкага райвыканкама Адам Кавалько падзякаваў біскупу і дэкану Астравецкага дэканату за правядзенне заўсёды канструктыўнага дыялогу і ўзаемаразуменне. Таксама старшыня райвыканкама выказаў надзею, што добрыя адносіны, якія існуюць паміж дзяржавай і Касцёлам, будуць падтрымлівацца далей на карысць усіх жыхароў астравецкай зямлі.

Кс. Юрый Марціновіч