21 снежня ў парафіі Святой Сям'і ў Лідзе адбылася аплаткавая сустрэча святароў Гродзенскай дыяцэзіі, на якой прысутнічалі біскуп Гродзенскі Аляксандр Кашкевіч і дапаможны біскуп Гродзенскай дыяцэзіі Юзаф Станеўскі.

Падчас сустрэчы біскуп Аляксанр Кашкевіч адзначыў, што зараз Паўсюдны Касцёл перажывае асаблівы час ласкі — Юбілейны Год Міласэрнасці. З гэтай нагоды біскуп заахвоціў усіх святароў у надыходзячым годзе быць вернымі «праваднікамі» Божай Міласэрнасці.

Гродзенскі ардынарый звярнуў увагу на тое, што гэтую міласэрнасць святары павінны перадаваць людзям, асабліва ў сакрамэнце пакаяння і паяднання. «Такой міласэрнасці кожны з нас патрабуе», — дадаў іерарх.

Біскуп падзякаваў усім святарам дыяцэзіі за ахвярнае служэнне ў сваіх парафіяльных супольнасцях і за ўсе душпастырскія ініцыятывы і пажадаў святарам не стамляцца ў пастырскім служэнні і вернасці, «быць вернымі Богу і людзям», якім яны пасланыя служыць.

Святары Гродзенскай дыяцэзіі, утвараючы вялікую асаблівую «святарскую сям’ю», у гэты дзень дзяліліся аплаткай і складалі адзін аднаму святочныя віншаванні.

Гэта ўжо другая аплаткавая сустрэча духавенства Гродзенскай дыяцэзіі перад святамі Божага Нараджэння. Першая адбылася 18 снежня ў Вышэйшай духоўнай семінарыі ў Гродне.

Кс. Юрый Марціновіч, (MV)
Фота Аляксандры Шчыглінскай