17 студзеня ў парафіі Св. Тэрэзы ад Езуса (Авільскай) у Шчучыне прайшла юбілейная ўрачыстасць 25-годдзя манаскага жыцця сястры Паўлы Марыі Волчак CSFN.

Эўхарыстыю ўзначаліў кс. Мікалай Ціхановіч. Падчас святой Імшы с. Паўла Марыя дала сведчанне свайго манаскага жыцця і распавяла пра тое, як выглядала яе ўласная дарога да Бога.

Таксама манахіня звярнулася да ўсіх дзяўчат і хлопцаў, прысутных на святой Імшы, каб, калі пачуюць «голас» паклікання, не баяліся выбраць манаскі стыль жыцця, а бацькоў папрасіла, каб падтрымалі ў гэтую хвіліну сваіх дзяцей і не баяліся аддаць іх на прыгожую службу Богу.

Пасля святой Камуніі с. Паўла ў прысутнасці ўсіх вернікаў аднавіла свае манаскія абяцанні, а на заканчэнне ўрачыстасці скіравала словы падзякі — найперш Богу, а таксама сям’і, святарам і манахіням, а акрамя таго, падзякавала ўсім прысутным за малітву ў яе інтэнцыі.

У юбілейных урачыстасцях прынялі ўдзел айцец Вітальд Пяцельчыц SP, пробашч парафіі ў Шчучыне, а. Віктар Бурлака OFM, кусташ Нацыянальнага анктуарыя ў Будславе, самыя блізкія з сям’і манахіні і сёстры назарэтанкі на чале з правінцыяльнай сястрой.

За некалькі дзён да гэтага ў шчучынскім кляштары прайшла сустрэча моладзі з с. Паўлай. Ужо некалькі гадоў манахіня працуе ў Аўстраліі.

Выкарыстоўваючы невялікі летні адпачынак (у Аўстраліі зараз лета), сястра прыляцела ў Беларусь. Падчас сустрэчы яна распавяла пра сваё жыццё і працу на аўстралійскім кантыненце, падзяліўшыся ўражаннямі пра культуру і рэлігію гэтага края. Слухачы маглі даведацца пра цікавыя выпадкі, звязаныя з традыцыямі кантынента, а таксама ўбачыць, як гэта выглядае на падрыхтаваных сястрой здымках.

А. Віталій Слука SP