У Мастах завяршаецца падрыхтоўка да ХХIII Дзён моладзі Гродзенскай дыяцэзіі, якія адбудуцца 7-9 мая. Дэвіз сёлетняй сустрэчы — «Пакліканыя быць прыладамі Божай міласэрнасці».

Удзельнікаў Дыяцэзіяльных дзён моладзі заахвоцяць яшчэ раз прыгледзецца да ўчынкаў міласэрнасці адносна душы і цела. У Юбілейны Год Божай Міласэрнасці, які перажывае зараз Каталіцкі Касцёл, да моладзі Гродзенскай дыяцэзіі будзе скіраваны заклік нанова адкрыць значэнне гэтых учынкаў і ісці ў свет, робячы іншым дабро.

Дні моладзі — асаблівы час для маладых людзей Гродзенскай дыяцэзіі, якога яны чакаюць з нецярплівасцю. Найперш гэта сустрэча з Богам, які хоча ўвайсці ў жыццё маладога чалавека са сваёй міласэрнасцю і ласкай. Таму арганізатары сустрэчы заахвочваюць да шматлікага ўдзелу ў ёй, каб разам будаваць супольнасць любові і міру.

Як быць прыладай Божай Міласэрнасці?

«Дні моладзі нашай дыяцэзіі — гэта непаўторная сустрэча з Богам і іншым чалавекам. Сустрэча моладзі ў Мастах, я перакананы, будзе, як і ў іншыя гады, напоўнена атмасферай радасці і хрысціянскай любові», — адзначыў у размове з Catholic.by галоўны арганізатар Дзён моладзі кс. Антоні Грэмза.

«Дарагі майму сэрцу малады чалавек! Калі хочаш правесці з Богам час і акунуцца ў сапраўдную хрысціянскую радасць, то запрашаем цябе на гэтую сустрэчу. Няхай вынікам сустрэчы будзе пошук адказу на вельмі важнае пытанне: як быць сёння прыладай Божай міласэрнасці», — дадае кс. Антоні Грэмза, скіроўваючы запрашэнне да моладзі Гродзенскай дыяцэзіі.

Праграма Дзён моладзі Гродзенскай дыяцэзіі i ўмовы ўдзелу>> 

У гэтым годзе ўдзельнікаў будзе прымаць парафія Маці Божай Тройчы Цудоўнай у Мастах, а таксама памежныя з ёй парафіі ў Росі, Воўпе, Мікелеўшчыне і Правых Мастах. Вернікі гэтых парафій адчыняць дзверы сваіх дамоў і сэрцаў, каб прыняць на начлег моладзь.

На XXIII Дыяцэзіяльныя дні моладзі Гродзенскай дыяцэзіі запрашаюцца ўсе жадаючыя маладыя людзі — вучні школ, прафесійных навучальных устаноў, студэнты вышэйшых навучальных устаноў.

Кс. Юрый Марціновіч