30 красавіка ў касцёле святога Міхала Арханёла ў Навагрудку біскуп Гродзенскі Аляксандр Кашкевіч асвяціў пасля рамонту арган, гукаў якога жыхары Навагрудка не чулі на працягу двух дзесяцігоддзяў.

Як расказаў пробашч парафіі кс. Юрый Жэгарын, на аднаўленне касцёльнага шасцігалоснага аргана, якому, да слова, больш за 100 гадоў, было затрачана шмат працы.

Спецыялістаў, якія маглі б выканаць гэту работу, у нашай краіне таксама няма, таму прыйшлося прыцягваць замежных. Зрэшты і неабходныя дэталі заказваліся за мяжой, большасць была дастаўлена з Германіі.

— Арган — гэта вельмі складана арганізаваны інструмент, і духавы, і клавішны адначасова, — падкрэсліў ксёндз Юрый. — Кожны яго голас — гэта цэлая сістэма трубак, куды нагнятаецца паветра, дзякуючы асаблівым скураным мяхам. У нашым аргане замяняць прыйшлося большую частку трубак, мяхоў, якія страцілі сваю эластычнасць, і іншыя дэталі. Работы працягваліся два месяцы, і напрыканцы сакавіка арган загучаў.

— Вібрацыі паветра ад гучання аргана адчуваюцца нават на падлозе, можна сказаць, што ствараецца своеасаблівае 3D-успрыманне музыкі. Нездарма арган называюць «каралём інструментаў», — адзначыў ксёндз Юрый. — Наш арган будзе выкарыстоўвацца не толькі падчас літургій. У самых бліжэйшых планах правядзенне ў касцёле арганных канцэртаў не толькі духоўнай, але і класічнай музыкі, якія так папулярныя ў краіне.

Падчас асвячэння аргана біскуп Аляксанд Кашкевіч выказаў упэўненасць у тым, што дзякуючы арыгінальнаму гучанню гэтага музычнага інструмента правядзенне літургій у касцёле стане больш прыгожым і ўрачыстым. Музыка, якая гучыць у святынях, праслаўляе Бога і дапамагае чалавеку маліцца, а гук аргана стане прыгожым сімвалам новай музыкі, якую вернікі спяваюць Богу.

Затым біскуп удзяліў сакрамэнт канфірмацыі 56 парафіянам, большасць з якіх — гэта моладзь. У жыцці каталіцкага верніка гэты сакрамэнт мае вялікае значэнне, бо сімвалізуе канчатковае ўвядзенне ў склад касцёльнага грамадства, умацоўвае Божую ласку, атрыманую пры хросце. Гучанне аргана і спевы хору Гродзенскай дыяцэзіі «Cantate Domino» зрабілі ўдзяленне сакрамэнту асабліва святочным і незабыўным.

Удзельнікамі ўрачыстасці таксама сталі намеснік старшыні райвыканкама Святлана Каралько, загадчык сектара фізічнай культуры, спорту і турызму аддзела адукацыі, спорту і турызму райвыканкама Л.М. Федарчук, святары з іншых парафій і парафіяне касцёла.

— Аднаўленне аргана ў касцёле Святога Міхала Арханёла — вялікая культурная падзея для ўсяго горада, — лічыць кс. Юрый Жэгарын. — Арыгінальных арганаў, якія прадстаўляюць матэрыяльную каштоўнасць, не вельмі шмат. Наш — адзіны дзеючы арган на некалькі раёнаў вобласці, таму ёсць усе падставы меркаваць, што яго гукі заклічуць у наш горад шматлікіх пілігрымаў і турыстаў з іншых рэгіёнаў краіны.

Анастасія Пятрова