12 ліпеня ў Вышэйшай духоўнай семінарыі ў Гродне адбыўся першы тур уступных экзаменаў для кандыдатаў на першы год навучання. Па яго выніках у семінарыю былі прыняты чатыры чалавекі: з Ліды, Ваўкавыска, Вялікай Бераставіцы і Смаргоні.

Пытанні на экзамене датычылі Катэхізісa Каталіцкага Касцёла, жыцця Паўсюднага і лакальнага Касцёла, што дазваляе ацаніць зацікаўленасць кандыдатаў тым, як жыве Касцёл. Таксама яны датычылi структуры Касцёла ў Беларусі.

Акрамя таго, кандыдатам трэба было патлумачыць матывы свайго следавання за Хрыстом, унутраны голас, які кліча іх да працы ў Хрыстовай аўчарні.

19 верасня першакурснікі распачнуць у семінарыі вучобу і фармацыю.

У каментарыі для Сatholic.by рэктар семінарыі ў Гродне кс. Раман Рачко адзначыў, што гэта толькі першы тур уступных экзаменаў. Другі запланаваны на 16 жніўня, і, наколькі вядома, ёсць яшчэ людзі, якія хацелі б паступіць у семінарыю ў гэтым годзе.

«Мы бязмерна цешымся тым, што Пан Бог кліча маладых людзей да служэння ў Касцёле ў нашай краіне. Канешне, пакліканне заўсёды з’яўляецца таямніцай і Божым дарам, таму мы дзякуем Богу за гэтых людзей і просім усіх нашых вернікаў маліцца за іх», — сказаў рэктар.

«Адначасова мы звяртаемся з просьбай і разам з тым заахвочваннем да малітвы ў інтэнцыі пакліканых і аб чарговых пакліканнях да служэння ў Касцёле», — дадаў кс. Раман Рачко.

Па словах рэктара, дзверы семінарыі адчынены для кожнага маладога чалавека, які адчувае ўнутраны голас паклікання, каб стаць святаром і ў будучыні служыць вернікам у нашай краіне, і мае ў сабе вялікае жаданне прысвяціць сваё жыццё Богу і Касцёлу.

Больш інфармацыі аб паступленні ў Вышэйшую духоўную семінарыю ў Гродне>>>

Кс. Юрый Марціновіч, (AG)