24 сакавіка, у Вялікі чацвер, у магілёўскай катэдры Унебаўзяцця Найсвяцейшай Панны Марыі і св. Станіслава адбылася Імша Хрызма, якую ўпершыню цэлебраваў біскуп вікарый для Магілёўскага рэгіёну Аляксандр Яшэўскі SDB. На Імшу прыбылі святары Магілёўскай часткі архідыяцэзіі і законныя сёстры.

На пачатку біскуп прывітаў усіх прысутных і павіншаваў духавенства з днём устанаўлення святарства. Іерарх адзначыў, што Вялікі чацвер збірае на гэтую святую Імшу біскупаў і прэзбітэраў ва ўсіх катэдрах каталіцкага свету. «Таксама і мы сабраліся разам у нашай старажытнай магілёўскай катэдры, каб дзякаваць Богу за дар пакліканя да святарства і за выбранне, якое мы, нявартыя, атрымалі як ласку ад Яго. Сабраліся, каб перапрашаць за свае слабасці і недахопы, а таксама маліць Усемагутнага падтрымліваць нас моцай Духа Святога і адарыць наш Касцёл новымі і святымі пакліканнямі», - сказаў біскуп.

У гаміліі іерарх разважаў над сутнасцю святарства і тым, якім вялікім Божым дарам яно з’яўляецца. «Звяртаючыся да вас, у першую чаргу я хачу прамаўляць да самога сябе, бо “з кожнага, каму дадзена шмат, і спагнана будзе шмат; і каму даручана шмат, ад таго больш і запатрабуюць” (Лк 12, 48)», - сказаў біскуп святарам.

Віншуючы святароў ад свайго імя, ад імя Мітрапаліта Мінска-Магілёўскага арцыбіскупа Тадэвуша Кандрусевіча і дапаможнага біскупа Мінска-Магілёўскай архідыяцэзіі Юрыя Касабуцкага, іерарх адзначыў: «Сёння, у дзень устанаўлення святарства, я хачу вельмі шчыра падзякаваць вашым бацькам, і жывым, і тым, хто адышоў па вечную ўзнагароду ў небе, што прынялі дар вашага жыцця і разам з ім перадалі вам веру. Падзякаваць за дапамогу ў распазнанні вашага шляху, які падрыхтаваў Бог, і за тое, што ніколі ў гэтым выбары не перашкаджалі, а наадварот, падтрымлівалі малітвай і сваім цярпеннем».

«Хачу падзякаваць і вам за тое, што распазналі час наведвання вас Богам у голасе святарскага паклікання. За тое, што адважыліся, нягледзячы на існуючыя сярод нас несправядлівыя меркаванні наконт Магілёўшчыны, прыбыць сюда як пасланцы Бога і адданыя пастыры Божага люду, - дадаў іерарх. - Падзякаваць вам за супрацоўніцтва і раздзяленне біскупскага служэння і руплівасць у выкананні тых выклікаў, якія ставіць перад намі штодзённасць. А гэта не толькі душпастырства; гэта і будаўніцтва, рамонты і нястомнае аднаўлення месцаў культу. Падзякаваць вам за адвагу прыняць самоту і за тое цярпенне, якое крыецца ў вашых святарскіх сэрцах і якое застаецца вядомым толькі Богу і вам».

«Вы патрэбныя магілёўскай зямлі, бо ў ёй жыве шмат сляпых, што ідуць па жыцці навобмацак, без веры; жыве ў ёй шмат Нікадэмаў, якія пад покрывам начы прыходзяць з цяжкімі пытаннямі; шмат фарысеяў, што даўно заблыталіся ў сваёй хлусні. Усім ім вы патрэбныя, каб абвяшчаць Праўду, якая здольная вызваліць іх скаваныя сэрцы з путаў», - падкрэсліў біскуп, звяртаючыся да духавенства.

«Абвяшчэнне гэтай Праўды патрабуе ад вас адвагі, але памятайце, што вы не адны. Святы Дух дзейнічае ў вас, бо Яго мы атрымалі ў сакрамэнце святарства. Мы ўжо дзейнічаем Ягонай сілай і ад імя Касцёла, які падтрымлівае нас двума тысячагоддзямі існавання, - адзначыў іерарх. - Ёсць у гісторыі нашай магілёўскай зямлі прыклады сведкаў, якія за Праўду аддалі жыццё. Памятаем пра іх асабліва тады, калі нас не разумеюць, калі веру нашу ігнаруюць, а з нашай паслугі здзекуюцца, як гэта неаднойчы было ў жыцці пастыраў нашай зямлі. Углядаемся ў іх таксама і тады, калі падступіцца спакуса выгадна ўладкаваць сваё жыццё, ідучы на кампраміс з гэтым светам, з ягонымі законамі і правіламі гульні».

«Жадаю, каб і надалей нашае святарскае служэнне давала вялікую радасць, якую немагчыма параўнаць ні з якой іншай радасцю, - сказаў іерарх. - А са свайго боку і з боку ўсіх вернікаў запэўніваю ў падтрымцы і дапамозе. Божа, благаславі нас, святароў, і ўчыні нашыя сэрцы падобнымі да Твайго, ціхімі, любячымі і міласэрнымі».

Падчас Імшы адбылося благаслаўленне алею хворых і кансэкрацыя алею хрызма.  

Таксама са словамі віншавання і шчырай удзячнасці ў адрас прысутных святароў звярнуліся вернікі.

Пасля Імшы адбылася сустрэча біскупа Аляксандра Яшэўскага SDB са святарамі і кансэкраванымі асобамі, падчас якой былі абмеркаваны бягучыя справы.

(AG)