У першую суботу месяца, 2 красавіка, у актаве Вялікадня адбылася чарговая, пятая аўтобусная пілігрымка з Мінска ў Нацыянальны санктуарый Маці Божай Будслаўскай, дзе ў Юбілейны Год адчынены брамы Божай міласэрнасці.

На гэты раз у Будслаў прыбылі таксама вернікі з Мядзельскага дэканата. Колькасць пілігрымаў з кожным месяцам паступова ўзрастае, прычым далучаюцца і праваслаўныя вернікі. Шмат пілігрымаў, якія прыбываюць у Будслаў, належаць да розных рухаў і супольнасцяў у Касцёле: «Каштоўная пярліна», «Легіён Марыі», «Сужэнскія сустрэчы» і іншыя.

Пілігрымка да Маці Божай Будслаўскай невыпадкова прыпала на дзень перад святам Божай Міласэрнасці і на 11-ю гадавіну з дня смерці Папы Яна Паўла II. Святы Ян Павел II асабліва ўшаноўваў Найсвяцейшую Панну Марыю і заклікаў быць міласэрнымі да бліжніх, таму што перамагчы ўсялякае зло ў сучасным свеце магчыма не зброяй, а толькі любоўю.

Падчас святой Імшы а 12-й гадзіне вернікі спявалі радаснае «Аллелюя» і  праслаўлялі Бога Усемагутнага за ўсе святыя дары і атрыманыя ласкі, асабліва за надзею на збаўленне праз хвалебнае Уваскрасенне Хрыста.  Святую Імшу цэлебравалі святары з Будслава, з Мінска, а таксама тыя, якія прыбылі ў Будслаў з Мядзельскага дэканата з нагоды ўрачыстасцяў Божай міласэрнасці.

У гаміліі святар асабліва звяртаў увагу на тое, каб кожны вернік задаў сабе пытанне, ці падобны ён сёння да Божай Маці ва ўсіх Яе цнотах і да Айца Нябеснага. Адзначалася, што, каб быць падобнымі да Айца Нябеснага, патрэбна быць міласэрнымі да бліжніх – міласэрнымі, як Айцец. Гэта азначае ўзрастаць у любові, заўсёды мець адкрытае сэрца на патрэбы бліжніх і ім дапамагаць, а не канцэнтравацца толькі на ўласных жаданнях, патрэбах і меркаваннях.

Пасля заканчэння Імшы ўсе прысутныя ў святыні мелі магчымасць наблізіцца да алтара і ўшанаваць рэліквіі святога Яна Паўла II, спецыяльна прывезеныя ў Будслаўскі санктуарый на дзень яго ўспаміну.

Пасля Імшы пілігрымы правялі спецыяльнае набажэнства першых субот месяца – Фацімскі Ружанец, – далучыўшы разважанні святой сястры Фаўстыны Кавальскай, якія яна запісала ў сваім Дзённіку «Божая міласэрнасць у маёй душы». У ружанцовай малітве гучалі заклікі перапрашэння за знявагі і блюзнерствы, накіраваныя супраць ушанавання Божай Маці.

А 15-й гадзіне, у час Божай Міласэрнасці, вернікі супольна памаліліся перад Найсвяцейшым Сакрамэнтам Вяночак да Божай Міласэрнасці, ахвяруючы Айцу Спрадвечнаму «Цела і Кроў, душу і боскасць» Яго «Наймілейшага Сына і Пана нашага Езуса Хрыста, каб перапрасіць за грахі нашы і ўсяго свету».

Потым яшчэ 15 хвілін трывала ціхая адарацыя Найсвяцейшага Сакрамэнту. Кожны вернік мог асабіста прадставіць Езусу Хрысту свае просьбы і падзякі, а таксама падзякаваць Божай Маці за Яе нястомную апеку і дапамогу.

Напрыканцы кожны ўдзельнік мінскай пілігрымкі атрымаў ад святара памятку «Нястомны пілігрым Нацыянальнага санктуарыя Маці Божай у Будславе».

Наступная падобная пілігрымка ў Будслаў адбудзецца 7 мая, у першую суботу месяца.

Ад’езд аўтобусам з Мінска ў 9 гадзін ад касцёла свв. Сымона і Алены.

Запісацца ў пілігрымку можна ў сакрыстыі касцёла або па нумарах:

8029 246 62 97 (мтс), 8025 618 17 50 (life) Уладзімір Вайцяховіч
8033 337 44 95 (мтс) Ірына Жук
8029 557 08 27 (мтс) Анастасія-Алена Блусянкова

Анастасія-Алена Блусянкова, фота аўтара