ІІ Нядзеля пасля Божага Нараджэння для вернікаў парафіі Святой Тройцы ў Ружанах стала днём сустрэчы з ардынарыем Пінскай дыяцэзыі — біскупам Антоніем Дзям'янкам. У святой Імшы, якую ўзначаліў біскуп, прынялі ўдзел таксама некалькі вернікаў праваслаўнага веравызнання.

У прэзбітэрыі пінскай катэдры ёсць насценны малюнак, на якім прадстаўлена сцэна Божага Нараджэння. Калі прыгледзецца бліжэй да асоб на гэтай карціне, тых, хто прыйшоў пакланіцца Езусу, можна ўбачыць людзей з характэрнымі для насельніцтва Палесся рысамі твару і адзеннем», — заўважыў біскуп, дадаўшы, што гэта сведчыць, што Езус Хрыстус прыйшоў калісьці і на Палессе, каб люд Божы таксама мог атрымаць надзею на збаўленне.

Малітву сям'і пры яслях біскуп назваў гэта «вельмі прыгожай традыцыяй, якая перадаецца з пакалення ў пакаленне». Праз супольную малітву пры яслях, спеў калядных песняў нашыя продкі, па словах іерарха, «захавалі сапраўдны змест каталіцкай веры», і менавіта дзякуючы ім, іх глыбокай веры, традыцыі, звязаныя са святамі Божага Нараджэння, застаюцца жывымі і ў нашыя часы.

Аднак жа, дадаў біскуп, як калісьці ў Бэтлееме, так і «сёння многія забываюць пра Езуса, аб пакланенні Яму ў перыяд Божага Нараджэння». Іерарх заўважыў,што сучасны чалавек вельмі часта шукае ў гэты святочны час толькі магчымасці для забаў і адпачынку. Узгадваючы пра ўсюды прысутную рэкламную прапаганду розных забаваў, іерарх заклікаў вернікаў не паддавацца гэтым тэндэнцыям паверхоўнага перажывання таямніцаў веры, бо грунтоўная, моцная вера і паслухмянасць Божаму закону неабходныя для пераадолення жыццёвых цяжкасцяй і неспакою.

Напрыканцы Імшы ксёндз біскуп узгадаў імёны славутых святароў, якія аказалі таксама і на яго вельмі глыбокі духоўны ўплыў: кардынала Казіміра Свёнтка, 100-годдзе якога будзе сёлета адзначацца, і ксяндза Міхала Варанецкага СМ, былога святара ружанскай святыні на працягу многіх гадоў, якія прыйшліся на «эпоху атэізму». Біскуп зазначыў, што жыццё гэтых духоўных асоб з’явілася той Божай іскрай, якая сілай непахіснай веры запальвала сэрцы шматлікіх вернікаў.

Галіна Саўчэнка