28 студзеня Міждыяцэзіяльная вышэйшая духоўная семінарыя ў Пінску адзначаe свята з нагоды ўспаміну свайго апекуна – св. Тамаша Аквінскага, святара і доктара Касцёла. У семінарыі быў святочны расклад дня. На свята прыбыў біскуп Пінскі Антоні Дзям’янка.

Іерарх узначаліў у семінарыйнай капліцы Імшу - галоўную частку свята. Біскуп у гаміліі назваў св. Тамаша Аквінскага адной з тых асобаў у дзеях навукі, рэлігіі, культуры, “якія не старэюць, да якіх часта звяртаемся”. Нагадваючы пра жыццёвы шлях святога, пінскі ардынарый звярнуў асаблівую ўвагу на знакі яго святасці, якімі былі “любоў да праўды, якая з’яўляецца мудрасцю”, “пакора ў пазнанні праўды”, “паслушэнства Касцёлу” як наступства пакоры, пастаянную малітву, любоў да духоўнага сузірання, да ведаў і мудрасці, якую ён шукаў “у Святым Пісанні, але і ў свеце створаным, а таксама ў працах сваіх папярэднікаў”.

Біскуп заклікаў семінарыстаў паразважаць над сваім будучым заданнем, да якога рыхтуюцца, і “аб сітуацыі ў свеце, у якім прыйдзецца несці Добрую Навіну”. Па словах біскупа, у сённяшнім кантэксце “неабходна тэалогія, якая была б бліжэй да жыцця”, бо “заўважаецца ў чалавека большая патрэба малітвы, цяга прыналежнасці да малітоўнай групы, дзе можна паглыбіць веру, пачуццё святасці, асабліва ва ўспрыняцці літургіі, і туга па добрым духоўным кіраўніцтве”, “таму ўсё больш узмацняецца сцверджанне аб пераасэнсавані Касцёла як носьбіта хрысціянскай культуры ў Касцёл місійны”.

Іерарх падкрэсліў, што ўжо ў семінарыі “неабходна добра падрыхтавацца да такой дзейнасці ў Касцёле”, што “прабыванне семінарыі не можа быць толькі выгодным жыццём, стэрыльным, далёкім ад свету”. Найбольшай пагрозай для духоўнага развіцця біскуп назваў “мінімалізм і абыякавасць”, дадаўшы, што семінарыст, які прымае такія паставы, “у будучыні як святар не паспрыяе аднаўленню Касцёла, не дасць новых імпульсаў”.

Пінскі ардынарый заклікаў семінарыстаў вучыцца “евангельскаму радыкалізму”, бо “нельга развітвацца з ідэаламі ўжо на пачатку святарскага шляху”. “Дух святога Тамаша – дух любові,  мудрасці, малітвы, дух пакоры, паслушэнства, дух добразычлівасці адносна нашых папярэднікаў - нам сёння вельмі патрэбны”, - заключыў біскуп.

Апрача семінарыйнай супольнасці – навучэнцаў і выхавацеляў - на Эўхарыстыі прысутнічалі таксама а. Пётр Бялевіч OMI і кс. Павел Ярашэвіч, душпастыры парафіі Унебаўзяцця Найсвяцейшай Панны Марыі ў Пінску.

Пасля Імшы ўсе прысутныя былі запрошаны на святочны абед у семінарыйнай сталовай.

(AG)