У гомельскай парафіі Нараджэння Божай Маці вернікаў на нядзельную Імшу клічуць дзеці. Па чарзе школьнікі б’юць у касцёльныя званы. Гэта першы падобны вопыт у краіне, і ідэя заснаваць такую практыку нарадзілася ў скаўцкай групе пры касцёле.

Скаўты вырашылі дапамагчы мясцоваму 75-гадоваму званару, якому ўжо нялёгка ўзбірацца па прыступках 15-метровай званіцы.

Па словах кіраўніка скаўцкай групы пры гомельскай парафіі Станіслава Чарапко, у званоў гэтага касцёла няма перазвону, раўнамерны гук нараджаецца ад расхіствання ўсяго звана, і спецыяльнай адукацыі, каб званіць у такой манеры, не патрабуецца. Біць у званы ходзяць па пяць чалавек: два хлопчыка, дзве дзяўчынкі і дарослы.

У гомельскай парафіі ўпэўнены, што скаўцкі эксперымент стане традыцыяй таксама для іншых святыняў.

Паводле sb.by

(AG)