16 мая ў Драгічыне адбылося асвячэнне вуглавога каменя пад новы парафіяльны касцёл Маці Божай Каралевы. У гэты дзень Пінская дыяцэзія адзначала ўрачыстасць свайго апекуна – св. Андрэя Баболі. У парафію прыбыў біскуп Пінскі Антоні Дзям’янка.

Да гэтага часу набажэнствы ў Драгічыне праходзілі ў капліцы.

Біскуп звярнуў увагу ў гаміліі, што ва ўспамін св. Андрэя Баболі, апекуна дыяцэзіі і Палесся, у цэнтры горада адчыняюцца дзверы новага парафіяльнага касцёла, і гэта “вялікі дзень для Драгічына і Пінскай дыяцэзіі”. Іерарх нагадаў, што ў міжваенныя гады там быў збудаваны касцёл, але ў перыяд атэізму быў забраны ў вернікаў і выкарыстоўваўся для іншых мэтаў. Стараннямі парафіянаў і былога пробашча кс. Тадэвуша Стэчкоўскага была набыта звычайная хата і невялікі ўчастак зямлі, дзе ў заснавалі капліцу.

“Мы сёння дзякуем Богу за існаванне парафіі і за гэты год, за які быў збудаваны прыгожы касцёл, - дадаў пінскі ардынарый. - Вечны супакой кс. Тадэвушу Стэчкоўскаму за яго працу. Няхай добры Бог благаславіць цяперашняму пробашчу кс. Паўлу Кручэку, які ахвярна працуе ў вашай парафіі. Богу дзякуем за кожны сакрамэнт які тут быў удзелены (...) за кожны чын міласэрнасці, і за далонь, якая накарміла галоднага, напаіла сасмяглага і адчыніла дзверы свайго дома бяздомнаму”.

Па словах іерарха, новы касцёл “цешыць вока і радуе сэрца” таму, што “касцёл - гэта справа веры і справа сэрца”. “Сцены касцёла збудаваны з тысячы цаглін за кошт адрачэнняў, адмаўлення сабе ў многіх патрэбных рэчах, - адзначыў біскуп. - Вонкавы выгляд святыні - гэта многія малітвы бацькоў, маці, хворых, дзяцей і добразычлівых падарожных людзей. Такога будматэрыялу нельга купіць нават за вялікі кошт”.

“Якія будынкі мы будзем паказваць у будучыні ў нашых гарадах і пасёлках? Гэта касцёлы, - дадаў біскуп. - Наступныя пакаленні прачытаюць са сценаў і любоў, і веру, і надзею, і сціпласць, і працу многіх рук”. Іерарх падкрэсліў, што нават у эканамічна цяжкія часы будуюцца святыні, таму што іх будуюць не абавязкова багатыя людзі, але людзі веруючыя.

“За гэтую святыню, за гэтую веру, любоў і ахвярнасць няхай будзе нястомна і заўсёды праслаўлены Бог, - пажадаў пінскі ардынарый. - Ваша святыня вечна будзе абвяшчаць навіну аб Збаўленні.  Кожную нядзелю яна будзе абвяшчаць, што Езус уваскрос, што Ён жыве, што смерць была пераможана назаўсёды. Так святыня пачынае жыць і прамаўляць да жыхароў і праезжых. Са сцен святыні прамаўляюць да наступных пакаленняў вера, сціпласць, цярпенне і малітва тых, хто будуе дамы нашаму Богу”.

Іерарх заахвоціў сабраных даверыць далейшае развіццё драгічынскай парафіі Маці Божай Каралеве, пад тытулам якой яна паўстала.

(AG)