1 жніўня 2014 г. у Міждыяцэзіяльнай вышэйшай духоўнай семінарыі імя св. Тамаша Аквінскага ў Пінску адбыўся ўступны экзамен для тых, хто жадае прысвяціць сваё жыццё служэнню Богу і людзям. Кандыдаты на першы год навучання прадставілі веды па Катэхізісу і актуальным жыцці Касцёла, а таксама падзяліліся сваім бачаннем паклікання і месца Святога Пісання ў жыцці чалавека.

Па выніках экзамена новымі семінарыстамі сталі Аляксандр Кустэнка і Юрый Сідаровіч з парафіі ў Лебедзеве Мінска-Магілёўскай архідыяцэзіі. Перад імі не толькі шэсць гадоў вывучэння філасофскіх, тэалагічных і іншых дысцыплін, але перадусім час інтэнсіўнага пазнання свайго сэрца і ператварэння яго на ўзор Сэрца Езуса – Найвышэйшага Святара.

Кіраўніцтва семінарыі заахвочвае падтрымаць новых семінарыстаў малітвай.

Тыя, хто адчувае голас паклікання, могуць звярнуцца ў семiнарыю яшчэ да пачатку новага 2014/2015 навучальнага года.

(AG)