15 жніўня 2014 г. у пінскай катэдральнай базыліцы адбылася адпустовая ўрачыстасць Унебаўзяцця Найсвяцейшай Панны Марыі. Менавіта такі тытул носіць старажытная пінская святыня, у галоўным алтары якой знаходзіцца старадаўні абраз з выявай узнясення Маці Божай у нябесную хвалу.

Галоўную адпустовую Імшу ў катэдры ўзначаліў біскуп Пінскі Антоні Дзям’янка. Разам з пастырам дыяцэзіі ў цэлебрацыі бралі ўдзел святары, якія нясуць служэнне ў Пінскім дэканаце, кансэкраваныя асобы, навучэнцы і выхаваўцы Міждыяцэзіяльнай вышэйшай духоўнай семінарыі імя св. Тамаша Аквінскага ў Пінску.

У гаміліі біскуп Антоні Дзям’янка звярнуў асаблівую ўвагу сабраных на дар мацярынства як адзін з галоўных і найбольш прыгожых Божых дароў для жанчыны і ўсяго чалавецтва. Указваючы на асобу Панны Марыі, іерарх заклікаў вернікаў агарнуць асаблівым клопатам сучасных маці, ад якіх так моцна залежыць лёс сем’яў і будучага пакалення. Таксама пінскі ардынарый заахвоціў прысутных учыніць гэтае свята Маці Божай днём асаблівай падзякі за дар мацярынства – духоўнага і фізічнага.

На заканчэнне святочнай літургіі біскуп благаславіў прынесеныя вернікамі плады зямлі, зеляніну і кветкі. Завяршылася ўрачыстасць святочнай эўхарыстычнай працэсіяй па плошчы перад катэдральнай базылікай.

Кс. Андрэй Рылка