Успамін благаслаўлёнай Маці Тэрэзы Калькуцкай, законніцы, заснавальніцы жаночай манаскай кангрэгацыі Сясцёр Місіянерак Любові - супольнасці, якая займаецца служэннем бедным і хворым, - адзначаць манахіні гэтай кангрэгацыі ў Гомелі. Маці Тэрэза — лаўрэат Нобелеўскай прэміі міру, у 2003 годзе была далучана да ліку благаслаўлёных.

Адзіныя ў Беларусі прадстаўнікі супольнасці Маці Тэрэзы з розных краін служаць у Гомелі, дзе ўтрымліваюць Дом міласэрнасці, у якім дапамагаюць бедным і бяздомным. Сёстры ўжо больш за 20 гадоў займаюцца справамі, за якія мала хто хацеў брацца. Дом міласэрнасці служыць прытулкам для некалькіх хворых мужчын і жанчын, якія апынуліся на вуліцы без сродкаў да існавання. Законніцы даглядаюць за імі, лечаць, дапамагаюць кінуць піць, аднавіць дакументы, уладкавацца на працу, рыхтуюць абед для бяздомных, раздаюць прадукты і адзенне для бедных сем'яў і адзінокіх старых, працуюць з дзецьмі з малазабяспечаных і праблемных сем'яў.

Парафіяне касцёла дапамагаюць у Доме міласэрнасці карміць жабракоў, прыходзячы на працу ў сталовую. Дапамагчы можа кожны: напрыклад, раздаць ежу, памыць посуд, прынесці вопратку ці абутак.