29 верасня ў пінскім катэдральным касцёле прайшла ўрачыстая святая Імша, адной з нагодаў якой стаў пачатак новага навучальнага года ў Міждыяцэзіяльнай вышэйшай духоўнай семінарыі імя св. Тамаша Аквінскага ў Пінску. Урачыстую цэлебрацыю ўзначаліў біскуп Пінскі Антоні Дзям'янка. Імша адбылася таксама ў межах пастырскай сустрэчы святароў і кансэкраваных асобаў Пінскай дыяцэзіі.

Падчас святочнай Эўхарыстыі біскуп Пінскі здзейсніў абрад кансэкрацыі новага галоўнага алтара катэдры. Удзельнікамі важнай падзеі сталі біскуп Віцебскі Алег Буткевіч, дапаможны біскуп Мінска-Магілёўскай архідыяцэзіі Юрый Касабуцкі, рэктар Вышэйшай духоўнай семінарыі ў Гродне ксёндз Раман Рачко, ксёндз прэлат Эдмунд Даўгіловіч, святары, кансэкраваныя асобы дыяцэзіі і семінарысты.

Біскуп Антоні Дзям'янка ў слове прывітання падчас Імшы адзначыў, што Міждыяцэзіяльная вышэйшая духоўная семінарыя ўваходзіць у 90-годдзе свайго існавання з часу заснавання яе першым біскупам Пінскім, Слугою Божым Зыгмунтам Лазінскім, у 1925 годзе. Дадзеная душпастырская сустрэча, па словах іерарха, асабліва важная таму, што адбываецца незадоўга да пачатку Сіноду Біскупаў, прысвечанага сужэнству і сям’і, які распачнецца ў Рыме 5 кастрычніка. Пінскі ардынарый заклікаў малітоўна падтрымліваць ва ўсіх парафіях дыяцэзіі тых, хто будзе працаваць на Сінодзе, у тым ліку дэлегата ад Канферэнцыі Каталіцкіх Біскупаў Беларусі Мітрапаліта Тадэвуша Кандрусевіча.

Алтар як асаблівы сімвал 

Таксама іерарх нагадаў, якое важнае месца займае алтар у каталіцкай святыні. Па словах біскупа, алтар прыгадвае «аб духоўных ахвярах, якія мы, вернікі, павінны скласці Богу», а касцёльныя аўтары параўноўваюць вернікаў, якія моляцца, ахвяруюць Богу свае маленні і складаюць дары сваіх просьбаў, да жывых камянёў, з якіх Езус будуе алтар Касцёла.

«Хрысціянскі алтар з’яўляецца асаблівым алтаром, на якім на вякі містычным чынам становіцца прысутнай ахвяра крыжа аж да прыйсця Хрыста. З’яўляецца сталом, пры якім збіраюцца дзеці Касцёла, каб скласці падзякі Богу і прыняць Цела і Кроў Хрыста. Таму ва ўсіх касцёлах алтар — гэта месца падзякі, якая чыніцца праз Эўхарыстыю, вакол якога выконваюцца ўсе іншыя абрады Касцёла, — патлумачыў біскуп. — Годнасць алтара ў тым, што ён — стол Пана. І нават целы мучанікаў не дадаюць хвалы алтарам, але наадварот, алтар падкрэслівае годнасць месца пахавання мучаніка. Хоць усе святыя справядліва называюцца сведкамі Хрыста, аднак у сведчанні Крыві існуе асаблівая моц, якую поўнасцю выражаюць толькі рэліквіі мучанікаў, складзеныя ў алтары».

Пінскі ардынарый пажадаў, каб навука Касцёла аб значэнні алтара дапамагла ўсім сабраным «пабожна і свядома ўдзельнічаць у святых чынах», і каб гэтае святкаванне, багатае на розныя нагоды, «паспрыяла памнажэнню Божай хвалы і нашага збаўлення». 

Гамілію з нагоды радаснай для пінскай катэдры падзеі прамовіў біскуп Алег Буткевіч, які адзначыў, што алтар з’яўляецца месцам, дзе судакранаюцца матэрыяльная і духоўная рэальнасць. Алтар, а таксама сведчанне мучанікаў і святых, рэліквіі якіх знаходзяцца ў ім, служаць, па словах біскуп, накам таго, што вера не падманвае чалавека. Біскуп заклікаў таксама кожнага хрысціяніна быць знакам існавання духоўнай рэальнасці ў свеце.

Гісторыя алтара і гадавіна біскупскай сакры

Напрыканцы Імшы пробашч пінскай катэдры а. Пётр Бялевіч ОМІ распавёў гісторыю з’яўлення алтара. Новы алтар быў выкананы майстрам Баляславам Міхалэкам. Матэрыялам для яго стаў мармур, прывезены з Бразіліі.

У гэты ж дзень біскуп Антоні Дзям’янка адсвяткаваў шаснаццатую гадавіну біскупскага пасвячэння. «Дзякую за вашы малітвы ў маёй інтэнцыі, за здзейсненыя ўчынкі дабра, перапрашаю за недасканаласці і прашу аб малітве надалей, каб Бог выкарыстоўваў мяне, недасканалае начынне, у сваіх справах у Хрыстовым Касцёле, таксама ў руплівым служэнні Божаму Народу з вамі тут», — сказаў іерарх. Са словамі віншавання да біскупа звярнуліся рэктар семінарыі ў Пінску ксёндз доктар Ян Саламон і прадстаўнікі духавенства дыяцэзіі.

Урачыстасці ў пінскай катэдры завяршыліся супольнай малітвай у крыпце, дзе пахаваны кардынал Казімір Свёнтэк.

Пасля ў Міждыяцэзіяльнай вышэйшай духоўнай семінарыі былі ўручаны дыпломы выпуснікам гэтай навучальнай установы. 

Кс. Юрый Дрозд, AG