19 красавіка ў гомельскім касцёле Нараджэння Найсвяцейшай Панны Марыі прайшоў традыцыйны бясплатны Велікодны канцэрт класічнай музыкі. Яго далі лепшыя музыкі Гомеля, лаўрэаты міжнародных конкурсаў: артысты гомельскага сімфанічнага аркестра і ансамбля «Класік» пад кіраўніцтвам Таццяны Томсан.

У межах канцэрту выступілі салісты Вольга Кузьменка (вакал), Ганна Славашэвіч (флейта), Дзмітрый Міроненка (акардэон), Глеб Гарбатоўскі (скрыпка). Прагучалі творы І. Баха, Фрыдрыха II, Х. Глюка, К. Ельскага, Дж. Ласта, Й. Штраўса.

«Большасць аўтараў гэтай выдатнай музыкі — веруючыя людзі, якія атрымалі натхненне ад Пана на стварэнне гэтых твораў, і праз іх мы маем яшчэ адну магчымасць сустрэцца з Богам», — адзначыў пробашч парафіі кс. Славамір Ласкоўскі.

Нагадаем, музыкі ўжо шмат гадоў бясплатна выступаюць у касцёле з каляднымі і велікоднымі канцэртамі.