10 мая ў Лагішыне прайшлі ўрачыстасці, прысвечаныя гадавіне каранацыі цудатворнага абраза Маці Божай Лагішынскай, Каралевы Палесся. Напярэдадні, 9 мая, адбылася XXIII Дыяцэзіяльная пешая пілігрымка з Пінска ў санктуарый у Лагішыне. 

Каранацыя абраза адбылася ў 1997 г. дзякуючы намаганням кардынала Казіміра Свёнтка. Абраз вядомы з пачатку XVIII стагоддзя, калі ён праславіўся шматлікімі цудамі.

За адзін дзень удзельнікі пілігрымкі пераадолелі 28 кіламетраў. Да Каралевы Палесся адправіліся каля 90 вернікаў, у асноўным моладзь; самаму малодшаму пілігрыму было 2,5 гады, а самаму старэйшаму – 87. Вернікі пешшу накіроўваюцца ў Лагішын з пінскага катэдральнага касцёла Унебаўзяцця Найсвяцейшай Панны Марыі ўжо 23-і год, каб занесці свае просьбы і малітвы да цудатворнага абраза Маці Божай.

Распачалося паломніцтва ў 7.30 са штодзённых малітваў хрысціяніна і благаслаўлення на гэты святы шлях, якое ўдзяліў пробашч катэдры а. Пётр Бялевіч. Узначаліў пілігрымку кс. Павел Ярашэвіч, вікарый катэдральнага касцёла ў Пінску, які вёў вернікаў увесь шлях да Лагішына, служачы словам і ў сакрамэнце пакаяння. Нягледзячы на тое, што дарога трывала толькі няпоўны дзень, пілігрымка была напоўнена сапраўдным Хрыстовым Духам, спевам, малітвай, а таксама патрабавала сілы волі і фізічных сіл.

З Пінска вырушылі каля 70 чалавек, некаторыя далучыліся па дарозе, а ў самім Лагішыне Каралева Палесся магла вітаць перад сваім абліччам больш за 90 пілігрымаў, не лічачы тых, хто даехаў на саму святую Імшу. Далучыліся да шляху і выхаванцы Міждыяцэзіяльнай вышэйшай духоўнай семінарыі імя св. Тамаша Аквінскага ў Пінску. Яны займаліся арганізацыйнымі справамі, праводзілі малітвы і заўсёды былі гатовыя дапамагчы.

«Пілігрымка напоўнена рознымі падзеямі: шмат часу прызначана на малітву, але таксама і шмат, так скажам, вясёлага часу. Традыцыйна на абедзе навучэнцы Вышэйшай духоўнай семінарыі ў Пінску, якія таксама ўдзельнічаюць у пілігрымцы, праводзяць розныя забавы», — расказаў кіраўнік пілігрымкі кс. Павел Ярашэвіч беларускай рэдакцыі Ватыканскага радыё. Сёлетняя пілігрымка, па словах святара, была асаблівая і тым, што ўдзельнікі мелі магчымасць паслухаць расповеды семінарыстаў пра тое, як яны адкрылі сваё пакліканне.

У Лагішыне пілігрымы ўдзельнічалі ў святой Імшы і малітоўным чуванні ў вігілію ўрачыстасці ў гонар Маці Божай Лагішынскай.

Імшу для пілігрымаў узначаліў віцэ-рэктар духоўнай семінарыі ў Пінску кс. Уладзімір Русак. Гамілія, якую прамовіў кіраўнік пілігрымкі кс. Павел Ярашэвіч, скіравала ўвагу прысутных на тое, што «для Бога няма нічога немагчымага», і «калі ідзем з Богам і для Бога, то дасягнем мэты нашага шляху».

Паводле беларускай рэдакцыі Ватыканскага радыё; seminaryja.by

(AG)

Фота seminaryja.by