7 чэрвеня эўхарыстычныя працэсіі праходзілі ў Пінску, Баранавічах, Жлобіне і Гомелі. 4 чэрвеня працэсія адбылася ў Ляхавічах. У працэсіі Божага Цела ў Пінску і Баранавічах прыняў удзел біскуп Пінскі Антоні Дзям’янка.

Сотні вернікаў прынялі ўдзел ва ўрачыстых працэсіях у гэтых гарадах. У эўхарыстычнай працэсіі ў Пінску ўдзельнічалі таксама выкладчыкі і навучэнцы Міждыяцэзяльнай вышэйшай духоўнай семінарыі імя св. Тамаша Аквінскага, вернікі катэдральнай парафіі і парафіі Св. Бэнэдыкта з мікрараёнаў Лугі і Верасы, дзе будуецца новы касцёл з нагоды 90-годдзя Пінскай дыяцэзіі.

У Баранавічах аб’яднаная працэсія парафій Св. Яна Паўла II і Св. Зыгмунда і новастворанай парафіі Божай Міласэрнасці і Маці Божай Вастрабрамскай прайшлі ад касцёла Узвышэння Святога Крыжа з цэнтра горада да касцёла Маці Божай Фацімскай у мікрараёне Паўночны. Удзел у працэсіі прынялі душпастыры горада, кансэкраваныя асобы з супольнасцяў місіянераў Божага Слова (айцоў вербістаў), місіянерак Святой Сям’і, дамініканак і сясцёр ад Анёлаў, вернікі рознага ўзросту - маленькія дзеці, якія пасыпалі дарогу кветкамі, юнакі-міністранты, іх бацькі, людзі старэйшага ўзросту.

У гаміліі, скіраванай на працэсіі да вернікаў Пінска і Баранавіч, біскуп Антоні Дзям’янка засяродзіў увагу на Эўхарыстыі як вялікім скарбе, на патрэбе адарацыі для паглыблення хрысціянскай духоўнасці. Іерарх заклікаў сабраных падзякаваць за святароў, якія ахвярна служаць у парафіях, з’яўляюцца слугамі алтара і Эўхарыстычнага Хрыста.

Біскуп заахвоціў таксама да еднасці і чалавечай салідарнасці, узор якіх можна чэрпаць з Эўхарыстыі - крыніцы ўнутранай еднасці з самім сабою, каб не было розніцы паміж хрысціянскім навучаннем і штодзённым жыццём хрысціяніна. Пінскі ардынарый заклікаў і да салідарнасці ў адносінах да людзей, якія патрабуюць духоўнай і матэрыяльнай падтрымкі.   

(AG)

Гл. таксама Эўхарыстычная працэсія прайшла ў Баранавічах