Падчас рэстаўрацыйных прац у Гомельскім епархіяльным упраўленні Беларускай Праваслаўнай Царквы выявілі ўнікальны абраз. Спецыялісты вызначылі, што знойдзены ў вёсцы Уза Гомельскага раёна абраз Панны Марыі можа мець 400-гадовы ўзрост. Абраз заўважыў і прывёз у рэстаўрацыйную майстэрню епіскап Гомельскі і Жлобінскі Стэфан.

Пад некалькімі пластамі новай фарбы рэстаўратары выявілі старадаўні жывапіс, унікальны для Гомельшчыны. Мяркуецца, што абраз быў напісаны ў XVI-XVII стагоддзях пад уплывам італьянскага Адраджэння, пра што гаворыць таксама спосаб апрацоўкі дошак іконы. На ўплыў Рэнесансу паказваюць і прапорцыя кампазіцыі, і характэрнае становішча фігуры Мадоны, і мяккая, паветраная прамалёўка лікаў. Па словах рэстаўратара Гомельскай епархіі Алены Паповай, абраз выкананы тэмпернай фарбай на тонкім пласце ляўкасу ў тыпова італьянскім стылі. Юная Божая Маці з Дзіцяткам Езусам на руках стаіць на паўсферы – Зямлі, на якую Яна прынесла Сына Божага. Асаблівасць гомельскай Мадоны – ледзь улоўная ўсмешка, амаль як у загадкавай Джаконды.

Можна толькі здагадвацца, быў абраз прывезены ў Вялікае княства Літоўскае з Італіі або тут яго напісаў госць з далёкіх Апенін, а можа, і мясцовы майстар, які вучыўся ў Італіі.

Складана дакладна сцвярджаць, у святыні якой канфесіі размяшчаўся абраз, але першапачаткова напісаны ён быў у заходнехрысціянскай (каталіцкай) традыцыі – з непакрытай галавой, а потым Панне Марыі дамалявалі хустку. Мяркуючы па ўсім, абраз «пераводзілі» з адной канфесіі ў іншую. Пра нялёгкі лёс іконы кажа і наяўнасць свінцовага дробу ў дошках – абраз расстрэльвалі, магчыма, у перыяд якой-небудзь з войнаў.

Пасля заканчэння рэстаўрацыйных прац абраз, магчыма, будзе змешчаны ў музеі епархіі.

Раней у Гомелі рэстаўравалі ўнікальны трохметровы абраз 1811 г. Яна Дамеля.

Паводле katolik-gomel.by

(AG)

Фота katolik-gomel.by