11 кастрычніка ў парафіі Маці Божай Фацімскай у Баранавічах адбыўся сакрамэнт канфірмацыі, які ўдзяліў біcкуп Пінскі Антоні Дзям’янка.

Звяртаючыся ў гаміліі да прымаючых гэты сакрамэнт, іерарх запрасіў іх скіраваць позірк да дзейнасці апосталаў, якія таксама ў дзень Пяцідзясятніцы ў Ерузалеме атрымалі дары Духа Святога. Біскуп нагадаў, што спачатку апосталы былі слабымі людзьмі: на Апошняй Вячэры спрачаліся, хто з іх больш важны, заснулі падчас малітвы Езуса ў Гетсіманскім садзе, а калі Хрыста арыштавалі, то ўсе ўцяклі, а Пётр адрокся ад Яго. Аднак яны, дадаў пінскі ардынарый, «здабылі адвагу абвяшчэння Евангелля», таму што «ўбачылі ўваскрослага Хрыста» і таму, што «ў дзень Пяцідзясятніцы на іх сышоў Святы Дух».

«Праз хрост мы ўключаны ў Касцёл, многае ведаем, адчулі Божую любоў. Аднак мы пастаянна маем патрэбу ў моцы Духа Святога, ласкі канфірмацыі, каб захаваць Яго навуку, каб адчуць Яго радасць, надзею і моц», — падкрэсліў біскуп.

Іерарх звярнуў увагу, што «хрост — гэта пачатак Божага жыцця ў чалавеку», а канфірмацыя «вызваляе моц Духа Святога, дадзеную нам падчас хросту».

Біскуп адзначыў, што гэты сакрамэнт дае «ласку весці хрысціянскае жыццё, быць сведкамі Хрыста, абвяшчаць Евангелле і абараняць веру», дае «моц і адвагу да будавання Божага валадарства».

Пінскі ардынарый нагадаў пра сем дароў Духа Святога, якія атрымліваюць тыя, хто прымае сакрамэнт канфірмацыі, і якія «дапамагаюць выйсці з Добрай Навіной»: дары мудрасці, розуму, рады, мужнасці, умеласці, пабожнасці і боязі Божай. «Чатыры першыя — дапамога Духа Святога, каб мы думалі па-Божаму. Яны дапамагаюць зразумець Хрыстовы план. Іншыя тры дапамагаюць прыняць рашэнні, мілыя Богу, і будаваць Хрыстовы Касцёл», — патлумачыў біскуп.

Іерарх дадаў, што, хоць канфірмацыя — аднаразовы акт, але «дары і ласкі, дадзеныя ў ім адзін раз, развіваюцца на працягу жыцця».  «Калі мы штодзённа будзем вучыцца слухаць Божае слова, то адчуем мацнейшае дзеянне яго дароў і ўсё мацнейшую сталасць у веры. Тады знойдзем у сабе гатоўнасць, адвагу і сілу, каб будаваць Божае валадарства», — сказаў біскуп Антоні Дзям’янка.

(AG)