Як адна вялікая сям’я, сабраліся вечарам 22 снежня на аплаткавую сустрэчу ўсе, хто мае непасрэднае дачыненне да Міждыяцэзіяльнай вышэйшай духоўнай семінарыі імя святога Тамаша Аквінскага ў Пінску: выхавацелі і выхаванцы, працаўнікі і выкладчыкі, спаведнікі і прадстаўнікі пінскай парафіі.

Сустрэча пачалася з вяршыні хрысціянскага сакрамэнтальнага жыцця — cвятой Імшы, якая адбылася ў семінарыйнай капліцы і якую ўзначаліў рэктар семінарыі ксёндз Андрэй Рылка.

На сустрэчу завітаў і біскуп Пінскі Антоні Дзям’янка. Іерарх благаславіў аплаткі, адзначыўшы важнасць і прыгажосць гэтай цудоўнай традыцыі на беларускіх землях.

Пасля пачалася святочная вячэра з цікавай праграмай, якую падрыхтавала семінарыйная супольнасць. Пасля доўгага «маўчання» зноў выступіў з некалькімі кампазіцыямі адроджаны семінарыйны гурт «Подых Духа», чыталіся вершы, праводзіліся конкурсы. Семінарысты прэзентавалі крэатыўную тэатральную пастаноўку на тэму Божага Нараджэння.

Самым важным жа было тое, што ўсё гэта праходзіла ў сапраўды сямейнай і цёплай атмасферы надыходзячых святаў: былі ўсмешкі, віншаванні і шчыры смех, святочныя спевы і падарункі…

«Збаўца надыходзіць, і ўсведамленне гэтага прыносіць радасць у сэрцы тых, хто Яго чакае! Няхай жа прыйдзе Ён і асветліць кожнае сэрца сваім незнішчальным святлом!

З надыходзячымі святамі Божага Нараджэння!» — віншуе семінарыйная супольнасць.

Андрэй Багдановіч, (IL)

Фота seminaryja.by