6 жніўня, ва ўрачыстасць Перамянення Пана, у парафіі ў Новай Мышы адбылася адпустовая ўрачыстасць, якую ўзначаліў біскуп Пінскі Антоні Дзям’янка.

Разважаючы над літургічным чытаннем гэтага дня, біскуп у гаміліі сказаў: «Мы з пэўнай зайздрасцю чытаем Евангелле, прызначанае на сёння. Быць удзельнікам такой падзеі — гэта і адрозненне, і ласка. Гэта дар, які падрыхтаваў Езус для сваіх сяброў, нават не для дванаццаці, але для траіх, якіх узяў з сабой. Яны бачылі перамененага Езуса. Бачылі слаўных мужоў Старога Запавету. Яны былі ў захапленні».

Аднак, дадаў іерарх, «яны спалохаліся, калі пачулі голас Нябеснага Айца: “Гэта Мой Сын умілаваны, Яго слухайце”». «Бог дае нам Свайго Сына, каб Яго слухалі. Хто Яго слухае, ніколі не прайграе. Выйграе і часовае жыццё, і вечнае. Навука Хрыста па-за канкурэнцыяй, хоць вельмі часта яе абсмейваюць і з ёю вядуць барацьбу», — падкрэсліў пінскі ардынарый.

Біскуп дадаў, што «Пан заклікае на Гару Перамянення», «прымусіць да гэтага нельга нікога». «Пан выбраў траіх — не дванаццаць. Пан іх паклікаў. Ён таксама і нас кліча на Гару Перамянення, кожнага — на сваю Гару Перамянення», — адзначыў іерарх.

Таксама біскуп звярнуў увагу на тое, як важна бачыць у Хрысце з Евангелля «сапраўднага Божага Сына, які ахвяруе сябе за іншых». «Каб захапляцца Хрыстом, людзі гатовы бачыць у Ім толькі героя. Такога Езуса прымаюць, — сказаў пінскі ардынарый. — Але Хрыста, аб якім гаворыць Бог Айцец: “Яго слухайце”, — такога прымаць не заўсёды згаджаюцца».

«Вучні Езуса сышлі з гары і захавалі маўчанне аб Перамяненні, аб вялікіх справах, сведкамі якіх былі на Гары Перамянення, — дадаў іерарх. — І нас Хрыстус заклікае да перамянення. Яно датычыць трох сфераў – думак, мовы і ўчынкаў».

Па словах біскупа, каб «думаць, як Хрыстус», мець евангельскае мысленне, «трэба чытаць Біблію, Катэхізіс Каталіцкага Касцёла, які ў скарачэнні прадстаўляе Біблію, бо слова Божае заўсёды актуальнае і ніколі не старэе». Кажучы пра важнасць перамены ў сферы мовы, пінскі ардынарый нагадаў, што яшчэ святы Ян Віянэй «у свой час звяртаў увагу, што большасць хрысціян любіць крытыкаваць, ачарняць і асуджаць», а адсюль «бяруць пачатак нянавісць, помста, гнеў, які працягваецца часамі да самай смерці».

Са зменамі мовы і думак, як адзначыў біскуп, «павінны ісці змены ў нашых паводзінах», і «нельга гаварыць, што не пераадолею кепскіх звычак, бо ўжо шмат разоў спрабаваў рабіць гэта»: «супрацоўнічаючы з Божай ласкай, можна выйсці з кожнай складанай грахоўнай сітуацыі».

Іерарх нагадаў, што ў жніўні Касцёл на Піншчыне асабліва заклікае паўстрымацца ад ужывання алкагольных напояў. «Гэта дабравольна прыняты абавязак і магчымасць практыкавання цноты паўстрыманасці», — патлумачыў біскуп.

Пінскі ардынарый заўважыў, што асаблівым месцам духоўных зменаў з’яўляецца святыня. «Тут, у гэтай святыні, сёння ёсць гара Табор. Тут нас Хрыстус перамяняе ў новых, у лепшых людзей, перамяняе нас сваім словам і ласкай. Ахвотна даверымся Божаму ўздзеянню. Няхай як найчасцей дарогі нашага жыцця праходзяць праз гэтую велічную гару Табор, якою з’яўляецца парафіяльная святыня, дзе мы на кожным набажэнстве сустракаемся з жывым Хрыстом. Ён перамяняецца, каб перамяніць нас», — сказаў, звяртаючыся да ўдзельнікаў святой Імшы, біскуп Антоні Дзям’янка.

(AG)