27 лютага пасля агульнай аўдыенцыі Святы Айцец Бэнэдыкт XVI сустрэўся ў Клементыйскай зале Апостальскага палацу з дзяржаўнымі дзеячамі Славакіі, Баварыі, Сан-Марына і Андоры.

«Я не пакідаю крыж, але новым чынам застаюся побач з Укрыжаваным», — з такімі словамі звярнуўся да вернікаў Святы Айцец Бэнэдыкт XVI падчас сваёй апошняй агульнай аўдыенцыі, якая 27 лютага прайшла на плошчы Святога Пятра. Развітацца з Пантыфікам прыйшлі каля 150 тысяч чалавек.

Святы Айцец Бэнэдыкт XVI даверыў малітоўныя інтэнцыі на 2014 год згодна са звычаем Апостальству малітвы. Гэтыя інтэнцыі прыводзіць новы нумар газеты «L’Osservatore Romano».

Падчас сустрэчы з журналістамі 26 лютага кіраўнік Прэс-службы Апостальскай Сталіцы кс. Фэдэрыка Ламбардзі паведаміў, што пасля сыходу з пасады Наступніка святога Пятpа Папу будуць называць «Яго Святасць Бэнэдыкт XVI», «Папа на пенсіі» або «Рымскі Пантыфік на пенсіі».

25 лютага быў апублікаваны Апостальскі ліст Бэнэдыкта XVI у форме «motu proprio» адносна некаторых зменаў у парадку выбараў Папы. У дакуменце Святы Айцец патлумачыў, што гэтыя змены неабходны для таго, каб «гарантаваць як мага лепшае здзяйсненне (...) абрання Рымскага Пантыфіка».

25 лютага Бэнэдыкт XVI прыняў на аўдыенцыі трох кардыналаў, членаў спецыяльнай камісіі, створанай для расследвання ўцечкі канфідэнцыйных дакументаў Апостальскай Сталіцы.

Папа Бэнэдыкт XVI скіраваў спачувальную тэлеграму з нагоды смерці бельгійскага кардынала Жульена Рыса, які адышоў у вечнасць 23 лютага ва ўзросце 93 гадоў. Гэты іерарх, якога Пантыфік год таму ўключыў у Калегію кардыналаў, лічыцца заснавальнікам фундаментальнай рэлігійнай антрапалогіі.

18 лютага Святы Айцец Бэнэдыкт ХVI зацвердзіў некаторыя змены ў «Ordo rituum pro ministerii Petrini initio Romae Episcopi» — рытуале, які змяшчае парадак цэлебрацый на пачатак служэння новаабраных Пантыфікаў.

«У гэты асаблівы момант прашу вас маліцца за мяне і за Касцёл, давяраючы, як заўсёды, Божаму Провіду», — напісаў 24 лютага ў «Твітэры» Святы Айцец Бэнэдыкт XVI. Гэта быў адзін з апошніх запісаў Папы на сваёй старонцы ў інтэрнэце.

Пасля малітвы «Анёл Панскі» 24 лютага Святы Айцец Бэнэдыкт XVI на розных мовах падзякаваў вернікам за малітоўную падтрымку, якой яны суправаджалі яго Пантыфікат. Папа звярнуўся да ўдзельнікаў малітвы на плошчы Св. Пятра на французскай, англійскай, нямецкай, іспанскай, партугальскай, польскай і італьянскай мовах.

23 лютага ў Апостальскай Сталіцы завяршыліся рэкалекцыі для Папы і Рымскай Курыі, якія правёў старшыня Папскай рады па культуры кардынал Джанфранка Равазі. На  заканчэнне духоўных практыкаванняў Святы Айцец выказаў іерарху падзяку за іх правядзенне, а таксама супрацоўнікам курыі, якія неслі з Пантыфікам на працягу 8 гадоў цяжар служэння Пятра.

23 лютага Святы Айцец прыняў Прэзідэнта Італіі Джорджыо Напалітана разам з яго жонкай. Італьянскі лідар стаў апошнім палітыкам, з якім сустрэўся ў сваім Пантыфікаце Бэнэдыкт XVI.

Кардынал Франчэска Кокапальмэрыа, старшыня Папскай рады па інтэрпрэтацыі заканадаўчых тэкстаў, аўтарытэтны спецыяліст па Кананічным праве, лічыць, што пасля адстаўкі Бэнэдыкта XVI, яго статус можа разглядацца як Біскуп Рыма на пенсіі, а яго тытул можа застацца такім, які выкарыстоўваўся да гэтага часу — Яго Святасць Бэнэдыкт XVI.

Афіцыйнага адказу на пытанне, што будзе з профілем Бэнэдыкта XVI у Твітэры пасля 28 лютага, пакуль няма. Верагодна, што акаўнт @Pontifex у перыяд sede vacante застанецца без змен, а пасля абрання новага Папы будзе прынята канчатковае рашэнне аб яго будучыні.

28 лютага Святы Айцец Бэнэдыкт XVI сустрэнецца асабіста з кожным кардыналам, які будзе ў гэты час у Рыме. Як вядома, у гэты дзень Пантыфік складзе з сябе паўнамоцтвы Біскупа Рыма.