2 верасня 2010 г. Святы Айцец Бэнэдыкт XVI удзяліў аўдыенцыю Прэзідэнту Ізраіля Шымону Пэрэсу. Лідэр Ізраіля сустрэўся таксама з Дзяржаўным сакратаром Яго Святасці кардыналам Тарчызіо Бэртонэ. Падчас размовы Папа і Прэзідэнт узгадалі аб мінулагодняй пілігрымцы Пантыфіка ў Святую Зямлю.

«Гаворачы аб ўзнаўленні непасрэдных кантактаў паміж ізраільцянамі і палесцінцамі, якое адбываецца сёння ў Вашынгтоне, я выказваю пажаданне, каб гэта дапамагло дасягнуць паразумення», — адзначыў падчас сустрэчы Папа.

Абодва бакі таксама асудзілі «ўсялякія формы насілля» і падкрэслілі неабходнасць «забеспячэння ўсім жыхарам Святой Зямлі лепшых умоваў для жыцця». Закраналася і тэма міжрэлігійнага дыялога.

Папа і Прэзідэнт Ізраіля абмеркавалі таксама адносіны паміж Ізраілем і Апостальскай Сталіцай, паміж дзяржаўнымі ўладамі і мясцовымі каталіцкімі супольнасцямі ў краіне. Было падкрэслена вялікае значэнне гэтых супольнасцяў для Святой Зямлі і ўклад, які яны ўносяць у агульнае дабро грамадства.

Бэнэдыкт XVI да гэтага часу сустракаўся з Шымонам Пэрэсам тройчы: 6 красавіка 2006 г. і 6 верасня 2007 г. у Ватыкане, а таксама ў маі 2009 г. падчас пілігрымкі ў Святую Зямлю.