Пасля першай агульнай аўдыенцыі папы Францішка 27 сакавіка на папскім профілі ў «Твітэры» з’явіліся два новыя запісы. «Быць пры Езусе патрабуе выхаду з саміх сябе, са змучанага і руціннага жыцця веры», — гаворыцца ў першым.

«Перажываць Вялікі тыдзень — значыць усё больш уваходзіць у Божую логіку любові і дару сябе», — чытаем у другім запісе на @Pontifex.

А падчас агульнай аўдыенцыі Папа адзначыў, што «пражыць Вялікі тыдзень, наследуючы Езуса не толькі ў сардэчных эмоцыях, азначае выйсці за рамкі самога сябе (...), ісці насустрач іншым, у накірунку перыферый існавання, першымі звярнуцца да нашых братоў і сясцёр, асабліва самых далёкіх, забытых, якія маюць патрэбу ў разуменні, суцяшэнні, дапамозе».

(AG)