9 красавіка папа Францішак сустрэнецца з Генеральным сакратаром ААН Пан Гі Мунам. 6 красавіка інфармацыю пра сустрэчу пацвердзіла Прэс-служба Апостальскай Сталіцы.

У сваю чаргу, паведамляе Ватыканскае радыё, прэс-сакратар ААН Марцін Нэсірскі адзначыў, што падчас сустрэчы Пантыфік і кіраўнік міжнароднай арганізацыі «абмяркуюць планы адносна далейшага супрацоўніцтва паміж ААН і Апостальскай Сталіцай».

30 сакавіка Пан Гі Мун пакінуў Нью-Ёрк, каб наведаць некаторыя краіны Еўропы, сярод якіх Сан-Марына, Андора, Манака, Іспанія, Галандыя і Італія. Падчас падарожжа Генсек ААН абмяркоўвае з кіраўнікамі дзяржаў і прадстаўнікамі ўладаў тэмы, звязаныя з барацьбой з беднасцю, кліматычнымі зменамі, вырашэннем праблемы свабоднага доступу да чыстай вады і медыцыны, пашырэннем магчымасцяў у сферы адукацыі і раўнапраўя ў адносінах да жанчын.

(AG)