«Папа Францішак намераны клапаціцца аб адзінстве хрысціян. Важнай і плённай у гэтым сэнсе стала сённяшняя сустрэча са старшынёй Рады Евангелічнай Царквы ў Германіі прэзэсам Нікалаусам Шнайдэрам», — адзначыў 8 красавіка кіраўнік Прэс-службы Апостальскай Сталіцы кс. Фэдэрыка Ламбардзі.

Як паведаміў святар, чые словы прыводзіць польская рэдакцыя Ватыканскага радыё, размовы датычылі экуменізму мучанікаў, чаму Пантыфік удзяляе вялікую ўвагу, добра ведаючы пра пакуты вернікаў Евангелічнай Царквы ў часы нацызму і іншых абставінах.

Прэзэс Нікалаус Шнайдэр закрануў таксама тэму 500-гадовага юбілею Рэфармацыі, які будзе адзначацца ў 2017 г.

Па словах кс. Ламбардзі, старшыня Рады Евангелічнай Царквы высока ацаніў атмасферу шчырасці, у якой адбылася размова з Пантыфікам, і звярнуў увагу на клопат Папы аб тым, каб усе хрысціяне памяталі аб крыжы Хрыста. Са свайго боку Святы Айцец папрасіў вернікаў Евангелічнай Царквы ў Германіі аб малітве за сябе, каб ён мог «выконваць сваё служэнне з моцай і адвагай». Напрыканцы сустрэчы суразмоўцы разам прамовілі малітву «Ойча наш».

(AG)