Фота Аўдыё Відэа  
be  ru  pl  en  de info@catholic.by
Гэта архіў старой версіі сайта. Новая версія знаходзіцца па адрасе catholic.by
Цэрквы ў Германіі заклікаюць да міру на Блізкім Усходзе
19.11.2012 12:33

Каталіцкі Касцёл і пратэстанцкія Цэрквы ў Германіі занепакоены ўзрастаннем насілля на Блізкім Усходзе. У супольнай заяве старшыня нямецкага епіскапату арцыбіскуп Роберт Цолліч і старшыня Рады пратэстанцкіх Цэркваў Германіі Нікалаус Шнайдэр заклікалі 18 лістапада Ізраіль і Палесціну да міру.

У заяве падкрэсліваецца, што гэты сур’ёзны канфлікт у Святой Зямлі можа дэстабілізаваць сітуацыю на ўсім Блізкім і Сярэднім Усходзе. Ён можа прывесці да небяспечнай радыкалізацыі настрояў у краінах рэгіёну. Таксама, як адзначаецца, гэта пагражае меншасцям у рэгіёне, у тым ліку хрысціянам, якія і без таго ўжо перажываюць вялікія пагрозы.

Як гаворыцца ў дакуменце, толькі рашучая воля ўсіх бакоў да дасягнення міру і гатоўнасць пайсці нават на сур’ёзныя саступкі можа адкрыць перспектыву выйсця. Для гэтага, як дадаецца, патрэбны людзі, якія б захацелі пераадолець былую варожасць. «Такія людзі ёсць у абодвух бакоў, а заахвочванне іх да дзейнасці на карысць міру — задача Цэркваў у Германіі», — падкрэсліваецца ў заяве.

(AG)

 

Пры выкарыстанні матэрыялаў сайта спасылка на Catholic.By абавязкова.

Спасылкі па тэме