«За ўсім маскарадам Хэлоўіна хаваецца адзінота сучаснага чалавека, яго духоўнае спусташэнне, магчыма, пошук свайго месца ў гэтым свеце і нават нейкае духоўнае здзічэнне», — адзначыў кіраўнік службы камунікацыі Аддзела знешніх царкоўных сувязяў Маскоўскага Патрыярхату а. Георгій Завяршынскі.

Як паведаміла 30 кастрычніка 2009 г. інфармацыйнае агенцтва «Интерфакс», святар падкрэсліў, што традыцыя штогадовага святкавання Хэлоўіна, якая прыйшла з Захаду, застаецца чужой расійскаму грамадству, праваслаўнай культуры і рускай культуры наогул. Царква, па словах а. Завяршынскага, «ніякім чынам не лічыць Хэлоўін святам і не разглядае для верніка магчымасць усур’ёз яго прыняць і ўвесці ў сваю традыцыю».

Разам з тым прадстаўнік Маскоўскага Патрыярхату лічыць, што Хэлоўін, «непажаданая для рускай культуры з’ява», з цягам часу можа страціць сваю папулярнасць у Расіі. З гэтай прычыны мае сэнс «пачакаць, пакуль гэтае свята знікне або проста маргіналізуецца і стане з’явай, зусім не характэрнай для нашага духу». Святар дадаў, што, магчыма, асуджаць свята было б і не варта, але, тым не менш, «у гэтай традыцыі, якая прыйшла з чужой культуры, належыць бачыць секулярную, свецкую з’яву».