Манаскія абяцанні «беларускага Дамініка Савіо», Мінск прапанаваны ў якасці сталіцы пасяджэння Рады Біскупскіх Канферэнцый Еўропы, сям’я з Беларусі ўручыла Папу Францішку падарунак і іншыя падзеі з жыцця Касцёла ў Беларусі за апошні тыдзень.

Арцыбіскуп Тадэвуш Кандрусевіч сустрэўся з Прэзідэнтам Ізраіля

Сустрэча прайшла ў межах правядзення Пленарнай Асамблеі Рады Біскупскіх Канферэнцый Еўропы, якая сёлета праходзіла на Святой Зямлі.

Старшыня беларускага епіскапату Мітрапаліт Мінска-Магілёўскі арцыбіскуп Тадэвуш Кандрусевіч трапіў у групу біскупаў, якія сустрэліся з кіраўніком дзяржавы Ізраіль Рэўвенам Рыўлінам. Іншая група біскупаў правяла сустрэчу з Прэзідэнтам Палесціны.

Прыгадваючы сустрэчу з ізраільскім лідарам, беларускі іерарх зазначыў: «Уваход у рэзідэнцыю быў вельмi простым». Некаторыя бiскупы не бралі з сабой пашпарты, і прадстаўлення кожнага біскупа кiраўнiцтвам РБКЕ аказалася дастатковым.

Папа Францішак атрымаў ружанец, змайстраваны сем’ямі з Беларусі

Падарунак для Пантыфіка з арыгінальнай задумкай перадала на папскай аўдыенцыі сужэнская пара Максіма і Аліны Угорыч — удзельнікаў малітоўнага руху Équipes Notre Dame.

Удзельнікам руху (каля 60 сем’яў) было прапанавана падрыхтаваць адну пацерку ад сваёй сям’і ў падарунак Святому Айцу. У выніку атрымалася сабраць ружанец, складзены з цалкам розных пацерак, частка з якіх была зроблена ўласнаручна. Ружанец быў асвечаны галоўным дарадчыкам руху кс. Андрэем Сіповічам.

250-годдзе пабудовы першай Кальварыі адзначылі ў Мядзелі

Першая Кальварыя ў Мядзелі была пабудавана ў 1765 годзе, пасля двойчы знішчалася і адбудоўвалася. Сённяшнія капліцы з’яўляюцца ўжо трэцяй адбудовай мядзельскай Кальварыі.

На сёлетняй урачыстасці ў Мядзелі прысутнічалі правінцыял Варшаўскай правінцыі кармэлітаў босых а. Ян Маліцкі OCD, а таксама Апостальскі Нунцый у Беларусі арцыбіскуп Клаўдыё Гуджэроцці.

 «14 святароў, дыякан і я…»: Біскуп Яшэўскі прыгадаў колькасць святароў на Магілёўшчыне

Дапаможны біскуп Мінска-Магілёўскай архідыяцэзіі Аляксандр Яшэўскі ў інтэрв’ю часопісу «Дыялог» распавёў пра задачы, якія стаяць перад ім як біскупам у душпастырскай працы на Магілёўшчыне, а таксама агучыў лік святароў, якія служаць у гэтым рэгіёне.

«Жніво на гэтай зямлі сапраўды вялікае, і, як кажа Пан Езус, “працаўнікоў мала”. 14 святароў, дыякан і я — 16 чалавек на Магілёўшчыне. Нашае заданне — стаць тымі сейбітамі, хто сее зерне Божага слова, Божае зерне: у каплічках, дзе яны ёсць, у святынях, дзе яны ёсць, пры розных сустрэчах. І сваім уласным жыццём даваць сведчанне хрысціянскага жыцця і хрысціянскіх каштоўнасцяў.

Думаю, гэтая ідэя — быць сейбітам — і дапаможа вярнуць былую славу Магілёўшчыне. А ў чым можа яна праявіцца? У людзях, бо людзі — гэта жывы Касцёл, жывая супольнасць, якая складаецца з народа Божага».

У Горках паўстала новая капліца (фотафакт)

Дзякуючы ахвярнай працы адміністратара парафіі кс. Андрэя Кеўліча і яго парафіян звычайны дом за год працы ператварыўся ў сапраўдную капліцу.

На фота: злева — выкуплены дом у Горках, справа — той жа будынак праз год

«Не было б капліцы, калі б не было вернікаў, якія сапраўды розным чынам актыўна дапамагалі падчас правядзення прац. Не было б горацкай капліцы, калі б не шматлікія парафіі нашай архідыяцэзіі, а таксама Віцебскай і Гродзенскай дыяцэзій. Не было б у нас асобнага месца малітвы, калі б не падтрымка каталіцкіх фундацый», — прызнаецца кс. Андрэй Кеўліч.

Святар дадае, што капліцу яшчэ чакаюць некаторыя відазмяненні (усталяванне крыжа над святыняй і інш.).

«Спадзяюся, што новае месца малітвы сапраўды стане магчымасцю распаліць агонь веры на горацкай зямлі, а перад усім — не даць яму патухнуць», — кажа кс. Андрэй.

Вуглавы камень будучай святыні асвяцілі ў мінскай парафіі капуцынаў

На ўскрайку Мінска, куды яшчэ не паспелі ўшчыльную падабрацца шматпавярховікі, сярод ляснога масіву, за вясковымі Капішчанскімі могілкамі ўзводзіцца новая святыня — будучы касцёл парафіі Святога Францішка Асізскага, якой апякуюцца айцы капуцыны.

Падчас урачыстай Імшы, якую ўзначаліў Мітрапаліт Мінска-Магілёўскі арцыбіскуп Тадэвуш Кандрусевіч, на алтары знаходзілася таксама манстранцыя з рэліквіямі св. Францішка Асізскага.

Мінск — адна з сямі капуцынскіх пляцовак у Беларусі. Акрамя сталіцы, манахі гэтага ордэна працуюць таксама ў Маладзечне, Ліпнішках, Слоніме, Докшыцах, Ваўкалатах і Смалявічах.

Маладзечанцы з «Catholic Crew» выйгралі каталіцкі футбольны турнір у Беразінскім

Сёлетні Кубак благаслаўлёнага Міхала Сапоцькі, які штогод уручаецца камандзе-пераможцы турніра ў Беразінскім, адправіўся ў Маладзечна.

Футбольная каманда юнакоў з парафіі Святога Юзафа выйграла на турніры ўсе матчы і стала чэмпіёнам турніру.

12 верасня футбол аб’яднаў восем каталіцкіх каманд з Гродна, Маладзечна, Беразінскага і Мінска. Будучыя чэмпіёны — маладзечанская каманда «Catholic Crew» — у фінале па пенальці перамаглі сваіх жа землякоў «ПФК Маладзечна».

Мітрапаліт Кандрусевіч верыць у шансы Мінска прыняць Пленарную Асамблею РБКЕ ў 2017 годзе

Запрашэнне правесці асамблею Рады Біскупскіх Канферэнцый Еўропы праз два гады ў Мінску старшыня беларускага епіскапату арцыбіскуп Тадэвуш Кандрусевіч агучыў падчас удзелу ў сёлетняй асамблеі, якая праходзіла на Святой Зямлі.

Запрашэнне беларускага арцыпастыра было ўспрынята апладысментамi, аднак пакуль невядома, цi атрымаецца правесцi асамблею ў сталiцы Беларусi.

«Правядзенне такога прадстаўнiчага форуму еўрапейскiх бiскупаў мела б вялiкае значэнне для Касцёла ў Беларусi i яго развiцця, — адзначае беларускі іерарх. —  Яно мела б значэнне для развiцця экуменiчных i мiжрэлiгiйных адносiн, а таксама адносiн памiж Касцёлам i дзяржавай».

Рашэнне будзе прынята падчас наступнай асамблеі, якая 6-9 кастрычнiка 2016 года пройдзе ў Манака. Сярод іншых апанентаў Мінска Фаціма — у 2017 годзе свет будзе адзначаць 100-годдзе аб’яўленняў Маці Божай у Фаціме.

«Дарога ў манаства». Сatholic.by прэзентаваў відэаролік, прысвечаны Году кансэкраванага жыцця

Што такое манаскае жыццё — ахвяра, шчасце, прыгода, служэнне? Знаёмства з некаторымі манаскімі супольнасцямі, а таксама гісторыі паклікання братоў і сясцёр, якія працуюць у Беларусі, — у відэаматэрыяле журналістаў Catholic.by.

Перыяд з 30 лістапада 2014 года да 2 лютага 2016 года ў Паўсюдным Каталіцкім Касцёле аб’яўлены Годам кансэкраванага жыцця.

Місіянеры Святой Сям’і прынялі вечныя манаскія абяцанні ад беларускага «Дамініка Савіо»

На слыннага салезіянскага святога, або хутчэй на выяву святога Дамініка Савіо на некаторых абразах, падобны беларус Аляксей Паплёўка MSF, які склаў вечныя манаскія абяцанні ў Кангрэгацыі Місіянераў Святой Сям'і ў Польшчы.

Аляксей Паплёўка паходзіць з Лагойска. Юнак стаў ужо пятым ураджэнцам Беларусі, які вырашыў рэалізаваць харызмат місіянера Святой Сям'і, і трэцім беларусам за апошнія тры тыдні пасля Віктара Рушлевіча і Паўла Лемеха, які склаў манаскія абяцанні ў мужчынскай манаскай супольнасці.

Ілья Лапато