«Каб Сінод Біскупаў мог да ўсіх данесці праўду
аб сакральным і непарушным характары сям’і»
(Папа Францішак)

Дарагія дыяцэзіяне!
Умілаваныя ў Хрысце Пану браты і сёстры!

На час Сіноду Біскупаў, прысвечанага сужэнству і сям'і, які будзе праходзіць у Рыме па волі Папы Францішка ў днях 5–19 кастрычніка 2014 г., заахвочваю ўсіх вас да малітоўнай лучнасці і падтрымкі тых, хто ўдзельнічае ў разважанні над важнымі справамі Касцёла ў гэтай галіне.

Падчас трывання Сіноду заахвочваю кожнага з вас узнесці да Пана Бога спецыяльную малітву, прапанаваную Папам Францішкам,  каб разам са святарамі і ўсімі прысутнымі вернікамі падчас кожнай святой Імшы прасіць святла Духа Святога і заступніцтва Святой Сям'і для сабраных на Сінодзе Біскупаў.

Заахвочваю таксама тых, хто моліцца на брэвіярыі, каб у сваё штодзённае маленне ўключылі гэтую малітву. Заахвочваю катэхетаў, каб на пачатку заняткаў узносілі да Бога гэтую малітву разам з усімі сабранымі. Заахвочваю сем'і і паасобных вернікаў, каб уключалі гэты малітоўны заклік да Пана ў сваю штодзённую індывідуальную ранішнюю альбо вячэрнюю малітву. Заахвочваю хворых і церпячых ахвяраваць свае цярпенні ў інтэнцыях Сіноду. Дзякую пробашчам за распаўсюджванне друкаванага тэксту малітвы за Сінод сярод вернікаў у час разнастайных душпастырскіх сустрэч.

У малітоўнай лучнасці з усімі вернікамі

+ Антоні Дзям'янка
Біскуп Пінскі

Пінск, 26 верасня 2014 г.

Гэты Заклік шаноўныя святары няхай прачытаюць у нядзелю 28 верасня альбо 5 кастрычніка 2014 г. на кожнай святой Імшы, а тэкст малітвы за Сінод размесцяць на прыкасцёльнай дошцы аб'яў да 26 кастрычніка 2014 г.