Амаль гадзіну працягвалася сустрэча кардынала Юзафа Томко з міністрам замежных спраў Беларусі Сяргеем Мартынавым. Сустрэча, што адбылася 8 кастрычніка 2010 г., прайшла ў сардэчнай атмасферы.

Бакі абмеркавалі пытанне адносна пагаднення паміж Беларуссю і Ватыканам. Як было адзначана Сяргеем Мартынавым, Беларусь жадае развіваць адносіны з Апостальскай Сталіцай.

Акрамя гэтага, падчас сустрэчы была звернута ўвага на вельмі добрыя адносіны паміж Каталіцкім Касцёлам і Праваслаўнай Царквой у нашай краіне.

Адно з узнятых пытанняў датычыла візіту папы Бэнэдыкта XVI у Беларусь. Пры гэтым было адзначана, што Пантыфік атрымаў запрашэнне як ад Прэзідэнта дзяржавы, так і ад беларускага епіскапату.

Пасля дадзенай сустрэчы папскага легата прыняў Прэзідэнт Беларусі Аляксандр Лукашэнка. У ходзе размовы была звернута ўвага на экуменічны аспект у каталіцка-праваслаўных адносінах у нашай краіне. Па словах кардынала Томко, Касцёл і дзяржава з’яўляюцца аўтаномнымі, аднак яднае іх адна мэта — агульнае дабро грамадства, таму дзейнічаць яны павінны разам.

Папскі легат перадаў Прэзідэнту Аляксандру Лукашэнка прывітанне ад Святога Айца Бэнэдыкта XVI.

У 15.00 кардынал Юзаф Томко наведаў мінскі праваслаўны Свята-Духаў катэдральны сабор. Затым ватыканскі іерарх здзейсніць экскурсію па каталіцкіх святынях Мінска.

Кардынал Юзаф Томко знаходзіцца з візітам у Беларусі з нагоды святкавання 300-годдзя кансэкрацыі сённяшняй мінскай архікатэдры.