13 мая 2011 г. арцыбіскуп Клаўдыё Марыя Чэллі, старшыня Папскай рады па сродках масавай камунікацыі, які прабывае з візітам у нашай краіне, наведаў храм Усіх Святых у Мінску. Ватыканскага іерарха суправаджаў Мітрапаліт Мінска-Магілёўскі арцыбіскуп Тадэвуш Кандрусевіч. Арцыбіскупа Чэллі сустрэў настаяцель прыхода Усіх Святых протаіерэй Феадор Поўны.

Царква з’яўляецца храмам-помнікам і прысвечана Усім Святым і бязвінна загінуўшым у нашай Айчыне. Першы камень у фундамент святыні заклаў у 1991 г. Патрыярх Маскоўскі і ўсяе Русі Алексій ІІ. Будаўніцтва храма распачалося ў 2006 г.

Протаіерэй Феадор Поўны распавёў аб сімволіцы храма, якая мае глыбокае значэнне, уражвае велічнасцю і прыгажосцю. Па словах протаіерэя, пры стварэнні храма быў узяты і вопыт Ватыкана. Асаблівую сімволіку мае крыпта, у якой пахаваны парэшткі беларускіх воінаў, што загінулі ў бітвах, пачынаючы ад XV ст. да нашых часоў. Звонку на дзвярах крыпты пазначаны адпаведныя перыяды гісторыі. «Калі мы адчынім гэтыя дзверы, пачынаецца сапраўднае паломніцтва ў гісторыю Беларусі», — адзначыў настаяцель храма, запрашаючы гасцей у крыпту.

За дзвярыма на сцяне крыпты знаходзіцца крыж Еўфрасінні Полацкай, а ў цэнтры — незгасальная лампада, запаленая агнём ад Гробу Пана ў Іерусаліме. У нашай краіне, адзначыў протаіерэй Феадор Поўны, таксама існуе паняцце Вечнага агню, аднак гэтае паняцце хутчэй язычніцкае. «Гэты сімвал мы напоўнілі хрысціянскім зместам, хрысціянскімі адносінамі да памяці», — патлумачыў святар, прадстаўляючы арцыбіскупу Чэллі крыпту. Як дадаў протаіерэй, асаблівая ўвага пры гэтым надавалася кожнаму чалавеку, бо «ад гэтага агню кожны можа зацяпліць сваю асобу, узнесці малітву да Бога і ўспомніць свой род». У знак такой памяці арцыбіскуп Чэллі і ўсе прысутныя таксама запалілі свечкі ад лампаднага агню.

Сваё значэнне маюць і нішы з оніксу, зробленыя ў сцяне крыпты. Як паведаміў протаіерэй Поўны, у гэтыя нішы штогод будзе класціся зямля, прывезеная з месцаў бітваў ва ўсім свеце, у якіх удзельнічалі беларусы. Гэты сімвал «дазволіць наведвальнікам храма паразважаць над старонкамі гісторыі».

У крыпце храма захоўваюцца і парэшткі ўдзельнікаў вайны 1812 г., Першай і Другой Сусветных войнаў. Як адзначыў настаяцель храма, праведзеныя археалагічныя і антрапалагічныя экспертызы пацвердзілі сапраўднасць гэтых парэшткаў.

Арцыбіскуп Чэллі і ўсе прысутныя паслухалі таксама спеў хору храма Усіх Святых.