Роварная пілігрымка разам з Мітрапалітам Тадэвушам Кандрусевічам стартавала ад Чырвонага касцёла

Беларусь - Мінска-Магілёўская архідыяцэзія

02.07.2014 13:21

Канец чэрвеня і пачатак ліпеня — гэта час пілігрымак у Будслаў. Пазаўчора з мінскай катэдры выйшла 24-ая па ліку пешая пілігрымка. Учора з Чырвонага касцёла выправілася пакутная пілігрымка, удзельнікі якой увесь шлях трываюць на хлебе і вадзе. 2 ліпеня раніцай з Чырвонага касцёла стартавала чарговая пілігрымка на роварах, на пачатку якой і напрыканцы традыцыйна прымае ўдзел Мітрапаліт Мінска-Магілёўскай архідыяцэзіі арцыбіскуп Тадэвуш Кандрусевіч.   Перад распачаццем пілігрымкі адбылася святая Імша, якую ўзначаліў Мітрапаліт. У гаміліі іерарх звярнуўся да фрагменту з Евангелля, дзе Езус вылечыў дваіх апантаных. «Гэта Евангелле аб рэальнасці жыцця чалавека, якім часта валодае д’ябал. Вера ў існаванне злога духа — гэта не міф, а неад’емная частка нашай веры, бо д’ябал існуе. Ён рэальны. Езус называе яго «бацькам хлусні». Ён — гэта злы дух, які адмаўляецца служыць Богу і не прызнае яго Валадарства. Таму мы таксама павінны памятаць, што калі хлусім і адмаўляемся служыць Богу, то ідзем вызначанай д’яблам дарогай. Вядомы хрысціянскі пісьменнік Клайв Льюіс кажа, што зло не нараджаецца ў асяроддзі маргіналаў, але ў салонах і офісах, дзе працуюць людзі з белымі каўнерыкамі. І сапраўды, там найбольш хлусні, карупцыі, інтрыг і г.д.», — сказаў іерарх. Арцыбіскуп заахвоціў глыбей засяродзіцца на сённяшнім Евангеллі і звярнуць увагу на наступныя тры вельмі важныя высновы. Па-першае, памятаць «што ўлада Езуса над злым духам абсалютная і ён баіцца Хрыста як агню. Бог не стварыў д’ябла, але д’ябал — гэта паўшы анёл, і ён імкнецца, каб як мага больш людзей пайшло яго шляхам. Д’ябал быў пераможаны Езусам на крыжы, значэнне якога ў тым, што той, хто церпіць за нашы грахі, - гэта не мы самі, але Бог». Па-другое, «Езус паказвае сваю дабрыню нават у адносінах да злога духа і выслухоўвае яго просьбу паслаць яго ў свіней, якія кінуліся ў ваду і загінулі. У гэтым праяўляецца бязмежная Божая міласэрнасць». У дачыненні да гэтай высновы арцыбіскуп прыгадаў словы вядомага пратэстанцкага прапаведніка Білі Грэма, які «любіў казаць, што дзіця запомніць толькі адну рэч, - ці былі дарослыя добрымі ў адносінах да яго. Таму ў адносінах да чалавека, які чыніць зло, неабходна праяўляць цярплівасць і чыніць усё, каб вярнуць яго на шлях веры». Трэцяя выснова, зробленая Мітрапалітам, датычылася рэакцыі жыхароў, якая была падчас цуду вызвалення апантаных з-пад улады д’ябла. «Яны не жадаюць бачыць Езуса і просяць Яго, каб Ён адышоў ад іх. Гэта, можа, найбольш сумныя словы Святога Пісання. Чаму? Таму, што гэтыя людзі больш прывязаныя да матэрыяльных спраў чым да духоўных, а таксама больш шкадуюць загінулых у вадзе свіней, чым цешацца з вызвалення з-пад улады злога духа апантаных», — адзначыў іерарх. Роварная пілігрымка, як і кожная іншая, з’яўляецца публічным вызнаннем веры, новым спосабам евангелізацыі і ўмацавання хрысціянскай салідарнасці паміж удзельнікамі пілігрымкі. Гэта таксама знак таго, што ў наш час, калі з'яўляецца ўсё больш сляпых у дачыненні да духоўных спраў, ёсць людзі, якія гэтыя справы ставяць на першае месца. Мітрапаліт Тадэвуш Кандрусевіч пажадаў удзельнікам роварнай пілігрымкі фізічнай і духоўнай вытрымкі, каб яны шчасліва даехалі да мэты падарожжа, радасна прывіталі Будслаўскую Марыю і ў Яе вучыліся заўсёды казаць Богу «так». (TK), (AYU)

Фотарэпартаж