Усё было сімвалічна ў гэты дзень: і пачатак Імшы а 15-й гадзіне, і вышытая выява святой Фаўстыны на арнаце аднаго са святароў, і спевы падчас Імшы, і цёплае веснавое сонца...

Быць узброенымі Божай Міласэрнасцю

3 красавіка, у свята Божай Міласэрнасці, у мінскай парафіі Маці Божай Ружанцовай (Лошыца) прайшла святая Імша, якую цэлебраваў Мітрапаліт Мінска-Магілёўскі арцыбіскуп Тадэвуш Кандрусевіч. 13 парафіян падчас Імшы атрымалі з рук арцыбіскупа сакрамэнт канфірмацыі.

У ліку святароў, якія канцэлебравалі Імшу, быў таксама кусташ Нацыянальнага санктуарыя Маці Божай Будслаўскай а. Віктар Бурлака OFM.

Вітаючы арцыбіскупа, гасцей і шматлікіх парафіян, пробашч парафіі кс. Генадзь Кухарэвіч зазначыў, што свята Божай Міласэрнасці асаблівае для яго парафіі, бо менавіта ў ёй будуецца Нацыянальны санктуарый Божай Міласэрнасці.

«Кожны з нас знаходзіцца на перадавой — у духоўнай барацьбе, якая адбываецца штохвіліну. І мы павінны быць узброены Божай Міласэрнасцю», — дадаў святар.
Таксама святар выказаў падзяку прысутнаму на Імшы кс. Уладзіславу Завальнюку, які і зарэгістраваў у свой час парафію Маці Божай Ружанцовай у Лошыцы, будучы яе першым пробашчам, і перадаў у парафію копію абраза Езуса Міласэрнага — таго самага, які быў напісаны па просьбе св. Фаўстыны і сёння выстаўлены ў Вільнюсе.

«Божая міласэрнасць — адна з прыкмет Божай любові»

Мітрапаліт Тадэвуш Кандрусевіч у сваёй гаміліі падкрэсліў, што Божая міласэрнасць з’яўляецца галоўнай прыкметай Бога, і заахвоціў прысутных быць носьбітамі Божай міласэрнасці ў свеце, які так часта напаўняецца эгаізмам.

«Божая міласэрнасць з’яўляецца адной з найвышэйшых прыкмет Божай любові — апагею ва Уваскрасенні Хрыста. Калі прасочым усю гісторыю хрысціянства, то пабачым, як праяўлялася Божая міласэрнасць у жыцці грамадства», — дадаў іерарх.

Паводле слоў арцыпастыра, «праз святую Фаўстыну ў аб’яўленнях Езуса Міласэрнага Бог хацеў паказаць сучасную праўду, каб людзі маглі зачэрпнуць з крыніцы Яго міласэрнасці».
Іерарх нагадаў, што гэтая ісціна з’яўляецца вельмі важнай і для чалавека XXI стагоддзя.

Звяртаючыся да прысутных з пытаннем: «Што азначае для нас, людзей XXI стагоддзя, праўда пра Божую міласэрнасць?», арцыбіскуп назваў Божую міласэрнасць выратавальным кругам у «грахоўным балоце».

«Ідэя Божай Міласэрнасці вельмі добра прадстаўлена ў абразе Божай Міласэрнасці: Бог ідзе да нас, Ён не забываецца пра нас. Ідучы, Ён паказвае на сваё сэрца, з якога сыходзяць два прамяні. Яго правая рука паднята ўверх і благаслаўляе ўсіх — і добрых, і злых. І рука быццам застыла — у жэсце адпушчэння грахоў».

Тэкст гаміліі цалкам тут››

Адзначаючы важнасць пакаяння, іерарх дадаў, што, «каб пакінуць грэх у канфесіянале, яго трэба спачатку туды прынесці».

«Наша зямля ўсеяна Галготамі...»

Прыгадваючы часы барацьбы камунізму з верай, арцыбіскуп падкрэсліў мужнасць хрысціян, якія пакутавалі за свае рэлігійныя пераканні:

«Нашых бацькоў і дзядоў за іх веру ў Бога высылалі ў сібірскія ссылкі, у стэпы Казахстана, на Далёкі Усход, Калыму, за Палярны круг і г.д. Яны сведчылі Хрыста на шматлікіх Галготах XX cтагоддзя, сярод якіх Трасцянец, Курапаты, Хатынь, Катынь і многія іншыя... »

Прыгадваючы 30-годдзе Чарнобыльскай катастрофы, якое будзе адзначацца 26 красавіка, Мітрапаліт заахвоціў не забывацца і пра духоўны Чарнобыль пераследу веры, які трываў тры пакаленні.

«Калі здавалася, што вера ніколі больш не адродзіцца на нашай зямлі, стаўся прадказаны Марыяй у Фаціме ў 1917 г. цуд яе адраджэння», — сказаў арцыбіскуп Тадэвуш Кандрусевіч.

Арцыпастыр заклікаў у 25-ю гадавіну аднаўлення структур Каталіцкага Касцёла ў Беларусі і заснавання Мінска-Магілёўскай мітраполіі падзякаваць Богу за дар ласкі і міласэрнасці, а таксама прасіць: «Нябесны Ойча, будзь міласэрны да нас».

«Езу, давяраю Табе»

Звяртаючыся да вернікаў, якія ў гэты дзень прынялі сакрамэнт канфірмацыі, іерарх адзначыў: «Трэба быць моцным у веры, а для гэтага неабходна адкрыцца Божаму Духу, каб Ён перамяняў вас. Будзьце носьбітамі Божай Міласэрнасці, каб яна ахінала ўсіх людзей на нашай зямлі і наш Касцёл».

Пасля святой Імшы быў зачытаны Акт прысвячэння Мінска-Магілёўскай архідыяцэзіі Езусу Міласэрнаму, а таксама адбылася супольная малітва Вяночкам да Божай Міласэрнасці.

«Міласэрны Езу! Благаславі нашу архідыяцэзію, біскупаў, прэзбітэраў, дыяканаў, кансэкраваных асобаў, усіх свецкіх вернікаў, патрабуючых і наш народ. Асвятлі нас і ўвесь свет прамянямі Тваёй Міласэрнасці. Марыя, Маці Міласэрнасці, заступайся за нас!» — гучала ў Акце прысвячэння архідыяцэзіі Езусу Міласэрнаму.

***

На двары побач з капліцай у гэты час пад цёплымі веснавымі прамянямі гарэзліва бегалі дзеці. Іх бестурботны смех час ад часу разам з сонцам дасягаў вокнаў капліцы, як бы нагадваючы сабраным на Імшы: жыццё, ты працягваешся!

Іх таты і мамы час ад часу заклапочана спраўджвалі — ці побач дзіця, ці не адбегла далёка. Нішто так не растопіць бацькоўскае сэрца, як усмешка дзіцяці, якое бяжыць у абдымкі, з сарванай кветкай у руках — «папа-папа, цветоцек!».

Хто, як не яны, маленькія дзеці, якія нязломна вераць сваім бацькам, павінны быць прыкладам для нас, каб аддавацца ў рукі Найвышэйшаму Айцу і Яго Міласэрнасці?..

Ілья Лапато,
фота Аляксандры Шчыглінскай