25 чэрвеня ў Нарачы распачалася сесія «Летняга багаслоўскага інстытута», ужо 13-га па ліку. Сёлета ЛБІ праходзіць на тэму «Хрысціянская этыка ў сучасным свеце на платформе праваслаўна-каталіцкага дыялога».

Як адзначыў Першы Намеснік Старшыні Міжнароднага адукацыйнага аб’яднання «Хрысціянскі Адукацыйны Цэнтр імя свв. Мяфодзія і Кірыла» Рыгор Даўгяла, сёлета ЛБІ будзе праваслаўна-каталіцкім, накіраваным на тое, каб кожная з канфесій магла раскрыць свае традыцыі і зняць існуючыя стэрэатыпы, якія не адпавядаюць рэчаіснасці. Акрамя гэтага ўвага слухачоў будзе звернута на пытанні хрысціянскай біяэтыкі.

Сярод слухачоў — урачы, настаўнікі, журналісты, бізнесмены, студэнты іншых спецыяльнасцяў.

«Летні інстытут», як адзначыў галоўны каардынатар праекта Рыгор Даўгяла, ствараўся з мэтай «далучэння ў багаслоўскі кантэкст свецкіх, якія не маюць багаслоўскай адукацыі і цікавяцца не толькі абрадамі, а імкнуцца праецыраваць царкоўнае вучэнне на сваё асабістае жыццё», а таксама даць арыенцір да самаадукацыі ў пытаннях навука і рэлігія, узаемаадносіны Царквы і дзяржавы, г.д.

З водгукаў удзельнікаў, па словах Рыгора Даўгялы, відаць, што ЛБІ дае добрую базу для далейшых самастойных пошукаў у галіне багаслоўя, накрэслівае арыенцір на рынку рэлігійных прапаноў. Вядомы выпадкі, калі няверуючыя праз пазнаванне багаслоўя і гутаркі з іншымі ўдзельнікамі праекта прыходзілі да веры.

За гэтыя 13 гадоў з’явілася сетка слухачоў ЛБІ, якія працягваюць кантактаваць паміж сабою і з выкладчыкамі.

Калі вы жадаеце стаць удзельнікам «Летняга багаслоўскага інстытута» ў наступным годзе, сачыце за інфармацыяй на сайце Міжнароднага адукацыйнага аб’яднання «Хрысціянскі Адукацыйны Цэнтр імя свв. Мяфодзія і Кірыла».

Валянціна Грамыка