29 жніўня 2010 г. у Бярозаўцы (Віцебская дыяцэзія, Докшыцкі дэканат) адбылася кансэкрацыя касцёла. Абрад здзейсніў біскуп Віцебскі Уладзіслаў Блін. У прывітальнай прамове да сабраных парафіянаў іерарх адзначыў, што шчаслівы стаяць на парозе новай святыні, у якую ўкладзена шмат працы, а таксама любові чалавека да Бога і Касцёла.

Касцёл у Бярозаўцы паўстаў з былога калгаснага будынка. Сёння яго вонкавы і ўнутраны выгляд нічым не нагадваюць аб яго колішнім прызначэнні. Біскуп Уладзіслаў Блін прызнаўся вернікам, што хацеў бы, каб усе новыя касцёлы дыяцэзіі адзначаліся такім вытанчаным мастацкім падыходам і прыгажосцю.

Галоўны праектант бярозаўскага касцёла — пробашч парафіі а. Марэк Пасют OFMCap. Удзячныя парафіяне і біскуп Віцебскі шчыра дзякавалі айцу Марэку за яго працу і руплівасць у справе будаўніцтва святыні. Усім вядома, што айцы капуцыны разам з пробашчам уласнаручна выконвалі многія працы пры рэканструкцыі будынка.

На ўрачыстасць у Бярозаўку прыбылі шматлікія госці з Докшыц і ваколіц. Сярод духавенства прысутнічалі святары Докшыцкага дэканату і браты капуцыны з беларускай віцэ-правінцыі ордэна на чале з а. віцэ-правінцыялам Андрэем Жылевічам OFMCap. На святой Імшы спяваў хор Докшыцкай парафіі і хор супольнасці грэка-католікаў з Віцебска на чале з а. Дзмітрыем Грышанам.

У бярозаўскім касцёле праз задумку а. Пасюта выдатна сплятаюцца дзве хрысціянскія традыцыі: заходняя і ўсходняя. У галоўным алтары змешчаны выявы св. Францішка з Асізі і св. Серафіма Сароўскага, паміж якімі — абраз Маці Божай Вострабрамскай. Як вядома, абраз Маці Божай Міласэрнасці ўшаноўваецца як католікамі, так і праваслаўнымі.

На свяце шмат гаварылася пра еднасць і адзінства. Яно бачна ў жыцці простых людзей у Бярозаўцы. Гэты жывы экуменізм не патрабуе пісьмовых дэкларацый і гучных канферэнцый.

Касцёл у Бярозаўцы невялікі па памерах. Але ён вялікі і велічны з прычыны свайго прызначэння. У ім цэлебруюцца святыя сакрамэнты. У ім святым алеем кансэкраваны сцены і алтар. У ім — жывы Езус у Эўхарыстыі.

Біскуп Уладзіслаў Блін, прамаўляючы гамілію, заклікаў вернікаў пашыраць хрысціянскую любоў і клапаціцца аб сваёй маленькай радзіме, каб беларуская вёска адрадзілася і не вымерла. Іерарх выказаў шчырую надзею, што бярозаўскі касцёл стане месцам аб’яднання і згуртавання парафіянаў і аднавяскоўцаў.

Кс. Віктар Місевіч